İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 327 Hüküm no: 304 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın berber dükkânı gediğini Halil Ağa’ya sattığı Berber Mahmiye-i İstanbul’da Kadırga limanı kurbünde Bostancıbaşı Ali Ağa mahallesi sâkinlerinden el-Hâc Ahmed Ağa b. Hüseyin nâm kimesne meclis-i şer‘-i münîrde Zülüflü teberdârlığından muhrec işbu bâ‘isü’l-kitâb el-Hâc Halil Ağa b. Mehmed mahzarında ikrâr-ı tâm ve takrîr-i kelâm edip İstanbul’da Sultanahmed meydanı kurbünde Saka Osman ve Mehmed Efendi’nin müşterek berber dükkânları ittisâlinde kâin Başmuhâsebe kaleminde el-Hâc Mehmed Usta ismine mukayyed diğer akāra tebdîl olunan bir bâb berber dükkânından müstahlas beyne’l-hıref gedik ta‘bîr olunur beş ustura ve bir kayış ve bir mikrâs ve iki cımbız ve iki sitil ve bir boğaz leğeni ve iki mir’ât ve bir kazgan ve iki tepsi ve iki tas ve sâir âlât-ı lâzıme-i ma‘lûme akd-i âti’z-zikrin sudûruna değin yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm el-Hâc Halil Ağa’ya bin iki yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin iki yüz guruşu müşteri-i merkūm bana tamâmen ve kâmilen def‘ ü teslîm ve ben dahi yedinden <> bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm âlât-ı gedik-i mezkûrda benim aslâ ve kat‘â alâka ve medhalim kalmayıp müşteri-i merkūm el-Hâc Halil Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 24 Ca sene 1247 Şuhûdü’l-hâl: Kethüdâ vekîli el-Hâc İbrahim Ağa, Şeyh Mustafa Efendi, Du‘âcı İsmail Efendi, Yazıcı es-Seyyid el-Hâc Abdurrahman Efendi, Yiğitbaşı es-Seyyid el-Hâc Mehmed Nuri Ağa.