İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 328 Hüküm no: 305 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Azledilen haffafların başkethüdası Said Efendi’nin yerine Mehmed Ağa’nın tayin edildiği
Haffâfân esnâfına kethüdâ nasbı
Âsitâne-i aliyye’de vâki‘ haffâf esnâfının başkethüdâları olan Said Efendi kethüdâlık-ı mezkûrdan bu def‘a azlolunduğuna binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâslarıyla ve hâlâ muhtesib-i İstanbul hâcegân-ı Dîvân-ı Hümâyûn’dan Mehmed Emin Faik Efendi’nin re’yi munzam idiği tarafından mürsel çukadârı Ahmed Ağa’nın inhâsıyla zâhir olan esnâf-ı mezkûrenin sâbık kethüdâları işbu bâ‘isü’l-kitâb el-Hâc Mehmed Ağa nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā sebt ü imlâ olundu.
Fî 25 Ca sene 1247
Şuhûdü’l-hâl: Çetikçiler Kethüdâsı el-Hâc Hüseyin Ağa, Mestçiler Kethüdâsı Osman Ağa, Süleyman Efendi, Mehmed Ağa, es-Seyyid el-Hâc Mehmed Efendi, el-Hâc Abdi Ağa, el-Hâc Hüseyin Ağa, es-Seyyid Mehmed Ağa, el-Hâc Halil Ağa.
Ensericisioğlu? Parsih zimmî, Ohannes v. Avadik zimmî ve Haçador zimmî ve Repail zimmî.
|