Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 427 Hüküm no: 505 Orijinal metin no: [81b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Mustafa ve oğlu Ahmed için kocası İsmail b. Ahmed üzerine nafaka takdiri Mahmiye-i İstanbul’da Bâli Paşa mahallesinde sâkine olup zâtını ma‘rifet-i şer‘iyye ile ârifân Abdülbâkī Efendi b. Ahmed ve Mustafa Efendi b. Mehmed nâm kimesneler ta‘rîfleriyle mu‘arrefe olan bâ‘isü’l-kitâb Raziye bt. Mustafa nâm hâtun meclis-i şer‘-i şerîf-i enverde takrîr-i kelâm edip gāib ani’l-meclis İsmail b. Ahmed nâm kimesne zevcim olup bundan akdem benimle mezbûrun firâşından hâsıl işbu sulbî sagīr oğlum Ahmed bilâ-nafaka ve kisve ve sâir levâzım-ı mühimmemiz için zevcim gāib-i mezbûr[a] kıbel-i şer‘den kadr-i ma‘rûf akçe farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûba-lehü ve hüsnü me’âb- hazretleri dahi ba‘de’t-tahlîfi’ş-şer‘î ber vech-i muharrer mezbûr Raziye için yevmî altı akçe ve sagīr-i mezbûr için kezâlik altı akçe ki cem‘an gāib-i mezbûr İsmail târih-i kitâbdan beher yevm on ikişer akçe nafaka farz ve takdîr edip meblağ-ı mefrûz-ı mezbûru kendiyle sagīr-i mezbûr Ahmed’e harc ve sarfa ve lede’z-zarûre istidâneye ve inde’z-zafer gāib-i mezbûr İsmail’e rücû‘a mezbûre Raziye Hâtun’a izin vermeğin mâ vaka‘a bi’t-taleb ketb olundu. Fi’l-yevmi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Edhem b. Ahmed b. Mehmed, Hüseyin Efendi, Abdülbâkī Efendi b. Ahmed, Mustafa Efendi b. Mehmed.