İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 336 Hüküm no: 314 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtip Ahmed Eşref Efendi’nin ev hissesini üvey validesi Nefise Hanım’a sattığı Keçeci Piri mahallesinde mülk menzil Mahmiye-i İstanbul hısnı ebvâbından Edirnekapısı dâhilinde Keçeci Pîrî mahallesinde sâkin Mevkūfât kalemi ketebesinden Ahmed Eşref Efendi b. el-müteveffâ Hüseyin Ağa meclis-i şer‘-i şerîf-i enverde mezbûr Ahmed Eşref Efendi’nin üvey vâlidesi olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe <> işbu bâ‘isetü’l-vesîka Şerife Nefise Hatun bt. Mustafa mahzarında ikrâr-ı tâm ve takrîr-i kelâm [edip] mahalle-i mezkûrede kâin bir tarafdan Hammâmî Ahmed Ağa menzili ve bir tarafdan Âişe Hatun bahçesi ve bir tarafdan üvey vâlidem mezbûrenin tasarrufunda olan hâriciye ta‘bîr olunur vakıf menzil ve bir tarafdan tarîk-i âm ile mahdûd ulyâda üç bâb oda ve bir hazîne odası ve bir sofa ve âbdesthâne ve kenîf ve vüstâda dört oda ve bir âbdesthâne ve kenîf ve süflâda bir matbah ve bir kiler ve eşcâr-ı müsmire ve gayr-ı müsmireli bahçeyi müştemil dâhiliye ta‘bîr olunur mülk menzil sekiz sehm i‘tibârıyla bir sehmi üvey vâlidem mezbûrenin ve yedi sehmi dahi akd-i âti’z-zikrin sudûruna değin benim yedimizde ırsen mülkümüz olmağla menzil-i mezkûrdan ben ber-minvâl-i muharrer mâlik olduğum hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile üvey vâlidem mezbûreye bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm menzil-i mezkûrun yedi sehm hisse-i şâyi‘asında benim aslâ ve kat‘â alâka ve medhalim kalmayıp mecmû‘u üvey vâlidem müşteriye-i mezbûre Şerife Nefise Hatun’un mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 29 Ca sene 1247 Şuhûdü’l-hâl: Rumeli kuzâtı eşrâfından Mehmed İzzet Efendi, Rumeli kuzâtından Hafız Mehmed Edhem Efendi, Doğramacı es-Seyyid Ahmed Ağa b. es-Seyyid Mehmed, Örücü Mustafa Ağa b. Abdi, Kethüdâ-i muhzırân Hafız İsmail Ağa.