İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 337 Hüküm no: 315 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un Bükücü Kigork’daki alacağını tahsil edip Kigork’un rehin olan destgâhını iade ettiği Asıl hüccet târîhi fî 16 Receb sene 1244 Fekk-i rehn-i ibrişim bükücü İşbu sebt-i hâmiş olunan hüccetde mezkûretü’l-ism Şerife Râbia Hatun bt. es-Seyyid Mehmed’in hemşîrezâdesi ve tarafından husûs-ı câ’i’z-zikrde vekîl olduğu Ustabaşı Ali Molla b. İsmail ve Osman Ağa b. Ahmed nâm kimesneler şehâdetleriyle sâbit olan es-Seyyid eş-Şeyh Mehmed Emin Efendi meclis-i şer‘-i münîrde kezâlik derûn-ı hüccetde ismi mastûr Bükücü Kigork v. Markar nâm zimmî muvâcehesinde bi’l-vekâle ikrâr-ı tâm ve takrîr-i kelâm edip ber-mantûk-ı hüccet müvekkilem merkūme Şerife Râbia Hatun’un mersûm Kigork zimmî zimmetinde aslen ve ribhan alacağı olan sekiz yüz on altı guruşu mesfûr Kigork zimmî müvekkilem merkūmeye tamâmen def‘ ü teslîm ol dahi yedinden ahz u kabz etmekle meblağ-ı mecmû‘-ı mezkûr mukābelesinde ber-mûceb-i hüccet yedinde rehin olan destgâh-ı mezkûru rehniyetden ba‘de’l-fekk mesfûr Kigor zimmîye teslîm etmeğin fîmâ-ba‘d meblağ-ı mezkûrdan müvekkilem merkūmenin zimmî-i mersûm yedinde bir akçe ve bir habbe alacağı ve destgâh-ı merkūmda dahi kat‘â alâka ve medhali kalmayıp ke’l-evvel mersûm Kigork zimmînin mülk-i mahzıdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 Receb sene 1247 Şuhûdü’l-hâl: Osman Ağa, Ali Molla, Hafız İsmail Ağa.