İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 337 Hüküm no: 316 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Raif Beyefendi’nin İskender Bey Vakfı’na ait bir ev ile arsayı kiraladığı Aksaray’da menzil keşfi Mahmiye-i İstanbul’da Aksaray kurbünde Murad Paşa-yı Atîk mahallesinde Yusufpaşa Çeşmesi nâm mahâlde sâkin Mehmed Raif Beyefendi b. el-merhûm Osman Nesib Efendi savb-ı şer‘-i enverden me’zûnen irsâl olunan Kâtib es-Seyyid Ahmed Rıza Efendi’nin mahmiye-i mezbûrede Gedikpaşa civârında Yahyapaşa Sarayı nâm mahâlde vâki‘ ricâl-i Devlet-i aliyye’den hâlâ Evkāf-ı hümâyûn nâzırı sa‘âdetlü es-Seyyid Mehmed Tahir Efendi’nin <> sa‘âdethânelerinde muhâsebe ketebesine mahsûs odada zeyl-i kitâbda mektûbü’l-esâmî zevât huzûrlarında akdeylediği meclis-i şer‘-i şerîf-i enverde Dârü’l-hilâfeti’l-aliyye Kostantıniyyeti’l-mahmiye’de câlis-i mesned-i şerî‘at-i garrâ olan fazîletlü efendiler hazerâtı nezâretlerinde âsûde evkāfdan mahmiye-i mahkiyede Edirnekapısı dâhilinde Neslişah Sultan Câmi‘-i şerîf vakfı mülhakātından İskender Bey Vakfı’nın mütevellîsi es-Seyyid Hüseyin Ağa b. es-Seyyid Hüseyin nâm kimesne mahzarında ikrâr-ı tâm ve takrîr-i kelâm edip sâlifü’z-zikr Yusufpaşa Çeşmesi’nde vâki‘ ma‘lûmü’l-hudûd ve’l-müştemilât terbî‘an bin yedi yüz beş zirâ‘ bir bâb menzilin hâriciyesinde cânib-i yemînde kâin terbî‘an iki yüz seksen üç zirâ‘ on beş parmak mahal ve üzerinde mevcûd tarîk-i âm cânibinde olan ebniyesiyle terbî‘an yüz kırk beş zirâ‘ altı parmak açıklık mahâlli şehriye on beş akçe icâre-i müeccele ile Haremeyn-i muhteremeyn vakfı musakkafâtından ve Haremeyn vakfından olan mahâllin verâsında hâriciye bahçesinde kâin havuz hizâsından dâhiliye tarafında matbah nihâyetine varınca terbî‘an iki yüz on yedi zirâ‘ mahal ve üzerinde olan bir havuz ve bir köşk ve bir matbah ve ebniye-i sâiresi şehriye yirmi iki buçuk akçe icâre-i müeccele ile kādı-i mûmâ-ileyhim nezâretlerinde mahmî evkāfdan mahmiye-i mezbûrede Edirnekapısı dâhilinde Neslişah Sultan Câmi‘-i şerîfi vakfı mülhakātından İskender Bey Vakfı musakkafâtından ve havuz-ı mezkûrdan menzil-i merkūmun verâ cânibi nihâyetine değin eşcâr-ı müsmire ve gayr-ı müsmireli terbî‘an üç yüz on altı zirâ‘ on iki parmak bi’l-cümle hâriciye bahçesi şehriye on akçe icâre-i müeccele ile Dârüssa‘âdeti’ş-şerîfe ağası nezâretlerinde âsûde evkāfdan merhûm Uncuzâde el-Hâc Hafız Mehmed Efendi Vakfı musakkafâtından ve mâ‘adâ menzil-i mezkûrun dâhiliyesi olup cânib-i yesârında kâin verâ tarafında nihâyete değin terbî‘an yedi yüz kırk üç zirâ‘ mahal ve üzerinde mevcûd bi’l-cümle üç kat ebniye ve tahtânî hamam ve câmekân ve tahtında câmeşûyhâne ve sarnıc ve bir mikdâr açıklık mahâlli şehriye doksan akçe icâre-i müeccele ile yine kādı-i mûmâ-ileyhim nezâretlerinde âsûde evkāfdan merhûme Fâtıma Hatun Vakfı musakkafâtından ve menzil-i mezkûrun karşısında Hacı Bayram Haftânî mahallesinde vâki‘ ma‘lûmü’l-hudûd ve’l-müştemilât terbî‘an iki yüz dokuz zirâ‘ bir bâb muhterik menzil arsası şehriye otuz akçe icâre-i müeccele ile Tersâne-i âmire emîni esbak merhûm el-Hâc Selim Ağa Vakfı musakkafâtından olarak kantar emîni kerîmesi Şerife Âişe bt. Osman nâm hatunun herbiri başka başka mütevellîleri temessükleri mantûklarınca müstakılleten taht-ı tasarrufunda iken mezbûre Şerife Âişe Hatun bundan akdem bilâ-veled fevt olup menzil-i merkūm ile arsa-i mezkûre mahlûl ve cânib-i evkāf-ı mûmâ-ileyhime âid ve râci‘ olmağla sûk-ı sultânîde ba‘de’l-müzâyede ve inkıtâ‘i’r-rağbe ber-mûceb-i kāime yirmi altı bin üç yüz guruşda benim üzerimde karâr ve meblağ-ı mezkûr menzil-i merkūm ile arsa-i mezkûrenin mu‘accele-i misliyyeleri idiği bi’l-ihbâr zâhir ve mütehakkık oldukdan sonra işbu sene-i mübâreke şehr-i Rebî‘ülevveli’nin on dokuzuncu günü târîhiyle müverrah bir kıt‘a i‘lâm-ı şer‘î nâtık olduğu üzere menzil-i mezkûrda olan evkāf-ı mûmâ-ileyhim mütevellîleri hâzır oldukları hâlde hulefâ-i mimâriyeden Ali Necib ve Mehmed Ârif ve Süleyman Salim halîfelerin misâhalarıyla her biri mütevellîleri oldukları vakıflarının <> mahallerini ta‘yîn ve hudûd ve irâe ederek ifrâz edip ba‘dehu mu‘accele-i mezkûre dahi her bir vakfın mahâllinin zirâ‘ ve ebniyesine göre ta‘dîl ve tesviye üzere hesâb-ı sahîh ile hesâb olundukda lede’l-muhâsebe mu‘accele-i merkūmeden her bir vakfa mebâliğ-i ma‘lûme isâbet etmekle merkūm es-Seyyid Hüseyin Ağa dahi mütevellîsi olduğu İskender Bey Vakfı’na üç bin yüz on guruş isâbet edip ol vechile mezbûr es-Seyyid Hüseyin Ağa mütevellîsi olduğu sâlifü’l-beyân terbî‘an iki yüz on yedi zirâ‘ mahal ve üzerinde mevcûd bi’l-cümle ebniyesini meblağ-ı mezkûr bin yüz on guruş icâre-i mu‘accele ve icâre-i müeccele-i mezkûresiyle bi’t-tevliye bana îcâr ve teslîm eylediğinde ben dahi ber-vech-i muharrer istîcâr ve tesellüm ve kabûl eylediğimden sonra mu‘accele-i mezkûre üç bin yüz on guruşu cânib-i vakf için mütevellî-i mezbûra def‘ ü teslîm ve umûr-ı vakfa sarfla istihlâka emr eylediğimde ol dahi yedimden bi’t-tevliye ahz u kabz ve emrim üzere umûr-ı vakfa sarfla istihlâk etmekle mu‘accele-i merkūmenin adem-i istîfâsına müte‘allika âmme-i da‘vâdan cânib-i vakfı ve mütevellî-i mezbûr es-Seyyid Hüseyin Ağa’nın zimmetini kabûlü hâvî ibrâ ve iskāt eyledim deyü mukırr-ı mûmâ-ileyh Mehmed Raif Beyefendi’nin bi’l-cümle takrîr-i meşrûhunu mütevellî-i mezbûr es-Seyyid Hüseyin Ağa tasdîk ve tahkīk eylediğini kâtib-i mûmâ-ileyh ma‘an meb‘ûs ümenâ-i şer‘le meclis-i şer‘-i şerîfe gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Ca sene [1]247 Şuhûdü’l-hâl: Muhzır Müezzinzâde Molla Halil b. Süleyman, Ali, el-Hâc Halil Ağa b. Hafız Mehmed, es-Seyyid el-Hâc Mehmed Hasib Ağa b. es-Seyyid Ali, Ketebeden Haşim Efendi b. Abdullah.