İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 339 Hüküm no: 317 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un soğancı mağazası gediğini Soğancı Mustafa Ağa ile hanımı Azime Hatun’a sattığı Langa Yenikapısı’nda soğancı Asıl hüccet târîhi fî 2 S sene [12]46 Kazasker’de İşbu sebt-i hâmiş olunan hüccetde ismi mezkûre Şerife Hacce Âişe Hatun bt. es-Seyyid Hafız Halil b. el-Hâc Mustafa tarafından husûs-ı âti’l-beyânda vekîl olduğu zâtını ârifân es-Seyyid Ali Ağa b. es-Seyyid İsmail ve Ömer Ağa b. el-Hâc Ali şehâdetleriyle sâbit olan es-Seyyid el-Hâc Ali Ağa b. es-Seyyid Ahmed meclis-i şer‘-i şerîf-i enverde işbu bâ‘isü’l-hâmiş kendi nefsinden asıl ve zevcesi Azime Hatun bt. Ömer tarafından ber-vech-i âtî tasdîka vekîl-i şer‘îsi olan Soğancı es-Seyyid Mustafa Ağa b. es-Seyyid İbrahim mahzarında bi’l-vekâle ikrâr-ı tâm ve takrîr-i kelâm edip hilâl-i sütûr-ı hüccetde muharrer Ayasofya-i Kebîr vakfı musakkafâtından bir bâb soğancı mağazası derûnunda mevcûde akd-i âti’z-zikrin sudûruna değin ber-mantûk-ı hüccet müvekkilem mezbûrenin mâlike olduğu âlât-ı gediği tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcân-ı asıl ve müvekkile-i mezbûrâna bin beş yüz guruşa bi’l-vekâle ale’l-iştirâk bey‘ ü temlîk ve teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl edip semen-i mezkûr bin beş yüz guruşu bana tamâmen def‘ ü teslîm ve ben dahi yedlerinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i merkūmda müvekkilem merkūmenin aslâ ve kat‘â alâka ve medhali kalmayıp müşteriyân-ı zevcân-ı asıl ve müvekkile-i merkūmânın mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 7 C sene 1247 Şuhûdü’l-hâl: Es-seyyid Ali Ağa, Ömer Ağa, Hafız İbrahim Edhem Ağa, Hafız İsmail Ağa, Ali Ağa tâbi‘.