İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 340 Hüküm no: 318 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Yuvan’ın dükkân gediği hissesinin yarısını Çukadar Mahmud Ağa’ya sattığı Manav gediği Âsitâne-i aliyye’de vâki‘ manav tâifesinden Yuvan v. Anaştaş nâm zimmî meclis-i şer‘-i hatîrde işbu bâ‘isü’l-vesîka Çukadâr Mahmud Ağa b. İbrahim nâm kimesne mahzarında ikrâr-ı tâm ve takrîr-i kelâm edip mahmiye-i mezbûre hısnı ebvâbından Bâb-ı Caferî hâricinde Yemiş İskelesi kurbünde Çardakönü nâm mahâlde kâin Ayasofya-i Kebîr vakfı musakkafâtından bakkāl dükkânına muttasıl bir bâb manav dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme akd-i âti’z-zikrin sudûruna değin benim [bâ]-hüccet-i şer‘iyye yedimde mâlım ve mülküm olmağla ben ber-minvâl-i muharrer mâlik olduğum gedik-i mezkûrun nısfını yedimde ibkā ve nısf-ı âharını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mahmud Ağa’ya üç bin beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr üç bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm nıfs gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Mahmud Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 12 C sene 1247 Şuhûdü’l-hâl: Kethüdâ-i muhzırân İsmail Ağa, İbrahim Edhem Ağa. Yuvan v. Mosail, Abraham v. Danil, Oristi? v. Nikola, Abraham v. Aslan.