İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 341 Hüküm no: 319 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa ile kız kardeşleri Hafize ve Mahtume’nin zeytin ve bakkal dükkânı gediği hisselerini Bakkal Dimitri’ye sattıkları Zeytinci ve bakkāl gediği mübâya‘ası Mahmiye-i İslambol’da Aşıkpaşa mahallesinde sâkin Salih Ağa b. el-Hâc Hasan nâm kimesne li-ebeveyn kız karındaşları Hafize ve Mahtume nâm hatunlardan merkūme Mahtume Hatun’un zevci ve taraflarından ber-vech-i âtî vekîlleri olduğu zâtlarını ârifân el-Hâc Süleyman Ağa b. Ömer ve Abdi Ağa b. Mehmed şehâdetleriyle sâbit olan Keresteci el-Hâc Mehmed Ağa b. el-Hâc İbrahim hâzır olduğu hâlde meclis-i şer‘-i münîrde bakkāl tâifesinden işbu bâ‘isü’s-sifr Dimitri v. Anaştaş zimmî muvâcehesinde ikrâr-ı tâm ve takrîr-i kelâm edip mahmiye-i mahkiye hısnı ebvâbından Ayazma Kapısı hâricinde vâki‘ Ayasofya-i Kebîr vakf-ı şerîfi musakkafâtından ma‘lûmü’l-hudûd ve’l-müştemilât el-Hâc Osman dükkânı denmekle arîf bir bâb zeytinci ve bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin dört sehm i‘tibârıyla iki sehmi benim ve birer sehmden iki sehmi dahi müvekkiletân-ı mezbûretânın akd-i âti’z-zikrin sudûruna değin yedimizde ırsen mülkümüz olmağla ben ve müvekkiletân-ı merkūmetândan her birimiz ber-minvâl-i meşrûh mâlikler olduğumuz hisse-i mezkûrelerimizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Dimitri zimmîye beş bin guruşa bey‘ ü temlîk ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş bin guruşu bize tamâmen def‘ ü teslîm ve biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt etmemizle fîmâ-ba‘d gedik-i mezkûrda benim ve müvekkiletân-ı mezbûretânın aslâ ve kat‘â alâka ve medhalimiz kalmamışdır dedikde mukırr-ı merkūm Salih Ağa’yı cemî‘ kelimât-ı meşrûhasında vekîl-i hâzır-ı merkūm el-Hâc Mehmed Ağa ve müşteri-i mersûm Dimitri zimmîden her biri bi’l-muvâcehe ve bi’l-müşâfehe tahkīk ve tasdîk etmeleriyle mâ-vaka‘a [bi’t-taleb ketb olundu] Fî 5 C sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Hafız İbrahim Edhem Efendi, Hafız İsmail Ağa, Muhzır Hüseyin Çelebi.