Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 429 Hüküm no: 507 Orijinal metin no: [82a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın mirastan düşen hakkını tamamen aldığı Mahmiye-i İstanbul’da Molla Hüsrev mahallesinde sâkin iken bundan akdem vefât eden Ahmed Beşe b. Mustafa nâm müteveffânın verâseti zevce-i metrûkesi Fâtıma bt. Mustafa ve sulbiye kebîre kızı Meryem zâtını ma‘rifet-i şer‘iyye ile ârifân Ahmed Efendi b. Ramazan ve İbrahim Çelebi b. Mehmed Çelebi ta‘rîfleriyle mu‘arrefe oldukdan sonra meclis-i şer‘-i şerîf-i enverde sadriye kızı mezbûre Meryem Hâtun tarafından husûs-ı âti’l-beyâna vekîl olduğu Ramazan b. Bâli ve Mehmed b. İbrahim şehâdetleriyle şer‘an sâbit olan zevci Mustafa Bey b. Hüseyin mahzarında bi tav‘ihâ ikrâr-ı tâm ve takrîr-i kelâm edip zevcim müteveffâ-yı mezbûr Ahmed Beşe zimmetinde beynimizde ilm-i şer‘le ma‘lûm menzil semeninden yüz elli esedî guruş hakkım olup meblağ-ı mezbûru bana kable’l-edâ fevt olmağla hâlâ meblağ-ı mezbûr yüz elli guruş ile zimmetinde mütekarrir ve ma‘kūdun-aleyh olan üç bin akçe mehr-i müeccelim ve hâlâ ma‘an sâkine olduğum ma‘lûmü’l-hudûd menzilden ve sâir terekeden bi hasebi’l-irsi’ş-şer‘î rub‘ hisseme isâbet eden dört bin akçe ki min haysi’l-mecmû‘ sekiz bin sekiz yüz akçe hakkımı kızım mezbûr[e] Meryem Hâtun yedinden bi’t-tamâm ve’l-kemâl ahz u kabz eylediğimden sonra zevcim müteveffâ-yı mezbûr Ahmed Beşe’nin nakid ve akār [ve] menkūle terekesine müte‘allika âmme-i da‘vâdan kızım mezbûr Meryem Hâtun’un zimmetini ibrâ ve iskāt eyledim ba‘de’l-yevm husûs-ı mezbûra müte‘allika nizâ‘ bi’l-asâle ve bi’l-vekâle benden sudûr ve zuhûr ederse lede’l-hükkâmi’l-kirâm min ba‘d mesmû‘a ve makbûle olmasın dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Abbas Efendi b. İbrahim el-İmâm, Ahmed Efendi b. Ramazan, İbrahim Çelebi b. Mehmed, Mustafa Çelebi b. el-Hâc Hasan.