Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 430 Hüküm no: 508 Orijinal metin no: [82b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Ağa b. Hacı Hasan’ın Ahmed Ağa b. Bâli’ye olan borcunu ödemesi Mahmiye-i İstanbul’da Odabaşı çarşısı kurbunda sâkin Ahmed Ağa b. Bâli tarafından husûs-ı âti’l-beyâna vekîl-i müsecceli olan işbu bâ‘isü’l-kitâb Hüseyin Çelebi b. Ali meclis-i şer‘-i şerîf-i enverde Şeyh Ebülvefâ câmi‘-i şerîfi kurbunda sâkin İsmail Ağa b. el-Hâc Hasan mahzarında bi’l-vekâle üzerine da‘vâ ve takrîr-i kelâm edip müvekkilim mezkûr Ahmed Ağa’nın mezkûr İsmail Ağa’nın sefînesi reisi olan Somuncuoğlu demekle şehîr Abdülkādir nâm kimesne zimmetinde cihet-i karz-ı şer‘den dört yüz yirmi yedi buçuk guruş hakkı olup mezbûr Abdülkādir müvekkilim mezbûru meblağ-ı mezkûr ile cümlesi bir meclisde iken mezkûr İsmail Ağa üzerine havâle-i sahîh-i şer‘iyye ile havâle ve her biri havâle-i mezkûru kabûl edip hattâ mezkûr İsmail Ağa meblağ-ı mezbûrdan cihetü’l-havâleti’l-mezkûr müvekkilim mezbûr zimmetinde lâzımü’l-edâ deyni olduğunu ikrâr ve işhâd ve meblağ-ı mezbûrdan iki yüz guruşu müvekkil-i mezbûra edâ ve teslîm ol dahi ahz u kabz edip iki yüz yirmi yedi buçuk esedî guruş bâkī kaldı hâlâ mezbûr İsmail Ağa’ya suâl olunup meblağ-ı mezbûrun alıverilmesi matlûbumdur dedikde gıbbe’s-suâl, akībe’l-inkâr, müdde‘î-i mezbûrdan müdde‘âsına beyyine taleb olundukda udûl-i müslimînden olup Kırk[çeşme] mahallesinde sâkin Mustafa b. Mehmed ve Musa Çelebi b. Cafer nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu mezkûr İsmail Ağa’ya reis-i mezkûr Somuncuoğlu Abdülkādir nâm kimesne müvekkil-i mezbûr Ahmed Ağa’ya cihet-i mezkûrdan olan dört yüz yirmi yedi buçuk guruş edâsı lâzım deyni bana havâle ben dahi kabûl etmekle meblağ-ı mezbûr dört yüz yirmi yedi buçuk guruş zimmetimde mezbûr Ahmed Ağa’ya lâzımü’l-edâ deynimdir deyû bizim huzûrumuzda ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm meblağ-ı bâkī iki yüz yirmi yedi buçuk guruşu vekîl-i mezbûra edâ ve teslîme mezbûr İsmail Ağa tenbîh olunup mâ vaka‘a bi’t-taleb ketb olundu. Fî evâili Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Mustafa, İbrahim Çelebi b. Ahmed, el-Hâc Mustafa b. Tevekkül, Ali b. Bâli.