İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 354 Hüküm no: 332 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bıçakçı Ebubekir Usta ile Ali Ağa ve Mehmed Emin ustaların bıçakçı dükkânı gediğindeki hisselerini Süleyman Usta’ya sattıkları Çakmakçı mübâya‘ası Mahmiye-i İstanbul’da Mercan kurbünde Dâye Hatun mahallesinde sâkin bıçakçı esnâfından Ebubekir Usta b. Hüseyin nâm kimesne asâleten ve esnâf-ı mezkûreden Mehmed Emin Usta’nın babası ve tarafından husûs-ı âti’l-beyânda vekîl olduğu Ömer Usta b. Ali ve es-Seyyid Mehmed Usta b. Mustafa şehâdetleriyle sâbit olan es-Seyyid Ali Ağa b. es-Seyyid Ali nâm kimesne vekâleten meclis-i şer‘-i şerîf-i enverde yine esnâf-ı mezkûreden işbu bâ‘isü’l-kitâb es-Seyyid Süleyman Usta b. Hüseyin mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûrede Çakmakçılar sûkunda vâki‘ Sünbüllühan kapısı ittisâlinde kâin bir bâb bıçakçı dükkânı derûnunda mevcûde beyne’l-esnâf gedik ta‘bîr olunur bir örs ve üç çekiç ve üç kısaç ve bir ocak ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye benim ve müvekkil-i merkūmun yedimizde iştirâken mülkümüz olmağla asıl-ı merkūm ben ve vekîl-i merkūm oğlum ve müvekkilim mezbûrun ber-minvâl-i muharrer mâlik olduklarımız gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bin yedi yüz guruşa bi’l-asâle ve bi’l-vekâle guruşa bey‘ ü temlîk ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin yedi yüz guruşu bize tamâmen def‘ ü teslîm ve biz dahi yedinden bi’l-asâle ve bi’l-vekâle ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i mezkûrda asıl-ı mezbûr benim ve vekîl-i mezbûr oğlum ve müvekkilim merkūmun aslâ ve kat‘â alâka ve medhallerimiz kalmayıp müşteri-i merkūm es-Seyyid Süleyman Usta’nın mülk-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 2 Receb sene 1247 Şuhûdü’l-hâl: Kethüdâ Mehmed Salih Ağa b. Mehmed, Yiğitbaşı Mustafa b. Ali, Mütevellî Mustafa b. Ali, Tuğcu Ahmed b. Abdullah, Muhzır Mahmud Çelebi.