İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 355 Hüküm no: 333 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursalı Pirinççi Mustafa Ağa’nın tütüncü dükkânı gediğini Mustafa Dastan Bey’e sattığı Tütüncü Mahmiye-i İstanbul’da Kadıçeşmesi kurbünde Yarhisarî Muslihiddin mahallesinde sâkin Pirinççi Bursavî Mustafa Ağa b. Süleyman meclis-i şer‘-i şerîf-i enverde işbu bâ‘isü’l-kitâb Mustafa Dastan Bey b. Abdülhakim tarafından husûs-ı âti’l-beyânda tasdîka vekîl-i şer‘îsi es-Seyyid Hasan Efendi b. el-Hâc Hüseyin mahzarında ikrâr-ı tâm ve takrîr-i kelâm edip mahmiye-i mezbûrede Tahmîs kurbünde Asmaaltı nâm mahâlde kâin bir tarafdan Giridî Mücellid Mehmed Emin Ağazâde Hasan Şemsi Ağa mahzeni ve bir tarafdan Pirinççi Kasımpaşalı el-Hâc Sadık Ağa veresesi mahzeni ve bir tarafdan duhân mahzeni ve bir tarafdan tarîk-i âm ile mahdûd bir bâb tütüncü mahzeni derûnunda mevcûde Ma‘den kaleminde kendi ismime mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin yedimde mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mûmâ-ileyhe on bin guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr on bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i müvekkil-i merkūm el-Hâc Mustafa Dastan Bey’in mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 4 Receb sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yazıcı Mehmed Emin Efendi, Yiğitbaşı Hafız Ahmed Ağa, Muhzır Hüseyin Çelebi.