İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 356 Hüküm no: 335 Orijinal metin no: [64b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize Hatun’un dükkân gediği hissesini Ömer Ağa’ya sattığı Kumkapı’da helvacı Asıl hücceti kassâmdan Fî 4 S sene 1244 Helvacı mübâya‘ası İşbu sebt-i hâmiş olunan hüccetde ismi mezkûre ve zâtı ta‘rîf-i şer‘î ile mu‘arrefe olan Şerife Hafize Hatun bt. Mehmed meclis-i şer‘-i münîrde kezâlik derûn-ı hüccetde ismi mezkûr es-Seyyid Ömer Ağa mahzarında ikrâr-ı tâm ve takrîr-i kelâm edip hilâl-i sütûr-ı hüccetde muharrer bir bâb helvacı ve turşucu dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf hisse-i şâyi‘ası benim ve nısf-ı şâyi‘i-i âharı merkūm es-Seyyid Ömer Ağa’nın akd-i âti’z-zikrin sudûruna değin [65a] yedimizde mülkümüz olmağla ben âlât-ı gedik-i mezkûrdan ber-mantûk-ı hüccet mâlike olduğum nısf hisse-i mezkûremi tarafeynden îcâb ve kabûlü [hâvî] şürût-ı müfsideden ârî bâtten ve sahîhan hissedârım mezbûr es-Seyyid Ömer Ağa’ya yedi bin beş yüz guruşa bi-safkatin vâhidetin bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr yedi bin beş yüz guruşu bana tamâmen def‘ ü teslîm ve ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm <> ile ibrâ ve iskāt etmemizle fîmâ-ba‘d nısf âlât-ı gedik-i mezkûrda benim aslâ ve kat‘â alâka ve medhalim kalmayıp mecmû‘u merkūm es-Seyyid Ömer Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 Receb sene 1247 Şuhûdü’l-hâl: Kethüdâ Receb Ağa, Alacahamamlı Halil Ağa, Aksaraylı Yakub Ağa, Langalı es-Seyyid Mustafa Ağa, Kasımpaşalı es-Seyyid Mustafa Ağa.