İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 357 Hüküm no: 336 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın berber dükkânı gediğini oğlu Mehmed Ağa’ya sattığı Kapan-ı dakīk hâricinde berber mu‘âyenesi Asıl hüccet târîhi fî 8 Za sene [1]245 kassâmdan İşbu sebt-i hâmiş olunan hüccetde mezkûrü’l-ism el-Hâc İbrahim Ağa b. Hasan nâm kimesne tarafından husûs-ı âti’z-zikrde vekîl olduğu Ahmed Şükrü Ağa b. el-Hâc Mehmed Emin ve Ali Yazıcı b. Salih nâm kimesneler şehâdetleriyle sâbit olan el-Hâc Ali Ağa [b.] Halil nâm kimesne meclis-i şerîf-i enverde müvekkil-i merkūmun sulbî kebîr oğlu Mehmed Ağa mahzarında bi’l-vekâle ikrâr-ı tâm ve takrîr-i kelâm edip ber-mantûk-ı hüccet müvekkilim merkūm el-Hâc İbrahim Ağa’nın yedinde mülkü olan âlât-ı gedik-i mezkûru tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile oğlu merkūm Mehmed Ağa’ya iki bin guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl ve semen-i mezkûr iki bin guruşu bana bi’t-tamâm <> def‘ ü teslîm etmekle ben dahi yedinden ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt etmemizle fîmâ-ba‘d âlât-ı gedik-i mezkûrda babası müvekkilim mezbûrun aslâ ve kat‘â alâka ve medhalim kalmayıp oğlu müşteri-i merkūm Mehmed Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 Receb sene [12]47 Şuhûdü’l-hâl: Kethüdâ vekîli el-Hâc İbrahim Ağa, eş-Şeyh Mustafa Efendi, Yiğitbaşı es-Seyyid el-Hâc Mehmed Nuri, Du‘âcı İsmail Ağa, Yazıcı es-Seyyid el-Hâc Abdurrahman, Odacı Hüseyin Çelebi.