İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 358 Hüküm no: 337 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hatun’un bakkal dükkânı gediğinin yarısını Bakkal Ahmed ve diğer yarısını da Bakkal Yorgi’ye sattığı Bakkāl Mahmiye-i İstanbul hısnı ebvâbından Eğrikapı dâhilinde Molla Aşkî mahallesinde sâkine ve zâtı zeyl-i vesîkada muharrerü’l-esâmî müslimîn ta‘rîfleriyle mu‘arrefe <> Nefise Hatun bt. İbrahim meclis-i şer‘-i münîrde işbu bâ‘isü’l-kitâb Bakkāl Ahmed b. Mehmed mahzarında Bakkāl Yorgi v. Yani nâm zimmî hâzır olduğu hâlde ikrâr-ı tâm ve takrîr-i kelâm edip mahâll[e]-i mezkûrede kâin Hacı Hüseyin dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme yüz yirmi sehm i‘tibârıyla akd-i âti’z-zikrin sudûruna değin müstakılleten yedimde mülküm olmağla ben ber-minvâl-i muharrer mâlike olduğum gedik-i mezkûrun nısfını merkūm Ahmed’e yüz yetmiş beş guruşa ve nısf-ı âharını dahi hâzır-ı mesfûr Yorgi zimmîye kezâlik yüz yetmiş beş guruşa tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr cem‘an üç yüz elli guruşu müşteriyân-ı mezbûrân mâllarından bana def‘ ü teslîm ve ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteriyân-ı merkūm Ahmed ile Yorgi zimmînin iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 4 Receb sene [12]47 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Ustabaşı Kiryako, Kabzımâl Sava, Yazıcı Yani.