İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 358 Hüküm no: 338 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Susana’nın iki adet yağcı bakkal gediğindeki hisselerini Kosti’ye sattığı Yağcı bakkāl Havâss-ı refî‘a kazâsına muzâfe Çekmece-i Kebîr nâhiyesine tâbi‘ Bigados karyesinde mütemekkine Susana bt. Kosti v. Politemos nâm Nasrâniyenin li-ebeveyn er karındaşı ve tarafından vekîl olduğu şahsını ârifân Vasil v. Yorgi ve Togodoş v. Lefter nâm zimmîler şehâdetleriyle sâbit olan Nikola nâm zimmî meclis-i şer‘-i hatîrde li-ebeveyn er karındaşları oğlu işbu bâ‘isü’s-sifr Kosti v. Lefter nâm zimmî muvâcehesinde bi’l-vekâle ikrâr ve takrîr-i kelâm edip İstanbul hısnı ebvâbından Bâb-ı Caferîye dâhilinde vâki‘ Yusuf Ağa dükkânı denmekle arîf ma‘lûmü’l-hudûd bir bâb yağcı bakkālı dükkânı ve ona merbût karşısında kâin bir bâb ve Sa‘lebci sokağı nâm mahâlde kâin bir bâb ki cem‘an iki bâb kârgir yağcı mağazaları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla otuzar sehmi Tohari zimmînin ve otuzar sehmi Yorgi zimmînin ve onar sehmi mersûm Togodoş zimmînin ve onar sehmi nısf pul hissesi Vasil zimmînin ve otuzar sehmi mesfûr Kosti zimmînin ve dokuzar buçuk sehm ve birer buçuk pul hisse-i şâyi‘ası müvekkile-i mersûmenin akd-i âti’z-zikrin sudûruna değin bâ-hüccet-i şer‘iyye yedinde mülkleri olmağla gedik-i mezkûrlardan müvekkilem mersûmenin ben ber-minvâl mâlike olduğu dokuzar buçuk sehm ve birer buçuk pul hisse-i şâyi‘a-i mezkûresini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Kosti zimmîye bin beş yüz guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin beş yüz guruşu bana def‘ ü teslîm ve ben dahi yedinden bi’l-vekâle tamâmen ahz u kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d [65b] gedik-i mezkûrun hisse-i şâyi‘a-i mezkûresinde müvekkilem mesfûrenin aslâ ve kat‘â alâka ve medhali kalmayıp ol vechile gedik-i mezkûrların otuzar dokuzar buçuk sehm bir buçuk pul hissesi müşteri-i mesfûr Kosti zimmînin mukaddemâ ve hâlâ mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 7 Receb sene 1247 Şuhûdü’l-hâl: Eş-şâhidûnü’s-sâbikūn.