İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 359 Hüküm no: 339 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marniye’nin tütüncü dükkânı gediğindeki hissesini kardeşi Panayot’a sattığı Tütüncü Kayd ihrâc-şüd Fî 17 R sene [12]64 Hâlâ Vilâyet-i Anadolu’da Eğin kazâsına muzâfe Puşadı nâhiyesine tâbi‘ Sorak karyesinde mütemekkine Marniye bt. el-hâlik Aleksan v. İlyin? nâm Nasrâniyenin zevci ve tarafından husûs-ı âti’z-zikrde bâ-hüccet-i şer‘iyye vekîl olduğu şahsını ârifân Numan Şakir Efendi b. Osman ve Muhzır Mehmed Çelebi b. Mustafa şehâdetleriyle sâbit olan Tütüncü Yordan v. Keşiş Yuvan nâm zimmî meclis-i şer‘-i hatîrde müvekkile-i mersûmenin li-ebeveyn er karındaşı işbu bâ‘isü’s-sifr Panayot muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Cibâli Kapısı hâricinde kürkçü ve manav dükkânları beyninde kâin şehriye üç buçuk guruş kirâlı Ma‘den kaleminde Ahmed b. İsmail ismine mukayyed ve mu‘teber bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin otuz iki sehm i‘tibârıyla yedi sehmi müvekkilem mersûmenin ve yedi sehmi kız karındaşı Meryem Nasrâniyenin ve on dört sehmi karındaşı mersûm Panayot zimmînin ve dört sehmi anaları Eva Nasrâniyenin akd-i âti’z-zikrin sudûruna değin yedlerinde bâ-hüccet-i şer‘iyye mülkleri olmağla müvekkilem mersûmenin ber-minvâl-i muharrer mâlike olduğu yedi sehm hisse-i şâyi‘asını ben tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Panayot zimmîye sekiz yüz guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr sekiz yüz guruşu mâlından bana def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik ba‘de’l-yevm gedik-i mezkûrun hisse-i şâyi‘asında müvekkilem mersûmenin aslâ ve kat‘â alâka ve medhali kalmayıp ol vechile âlât-ı gedik-i mezkûrun ber-i‘tibâr-ı merkūm yirmi bir sehm hisse-i şâyi‘ası mukaddemâ ve hâlâ müşteri-i mersûm Panayot zimmînin mülk-i mahzı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 15 Receb sene 1247 Şuhûdü’l-hâl: Kethüdâ Mustafa Kâşif Ağa, Vekîli Seyyid Mehmed Ağa, Yiğitbaşı Hafız Ahmed Ağa, Kethüdâ-i muhzırân İsmail Ağa, Muhzır Hüseyin Çelebi.