Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 431 Hüküm no: 509 Orijinal metin no: [82b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Sinan’ın mükâteb kölesi Ömer b. Abdullah’ı azat etmesi Mahmiye-i İstanbul’da Çukurhamam’da sâkin dellâk Ali b. Sinan meclis-i şer‘de abd-i mükâtebi olan işbu orta boylu açık kaşlı ala gözlü Rûsiyyü’l-asl hâmil-i hâze’l-kitâb Ömer b. Abdullah mahzarında üzerine da‘vâ ve takrîr-i kelâm edip bundan akdem mevsûf-ı mezbûr Ömer’i bana yetmiş esedî guruş verip ba‘de[hû] sâir ahrâr-ı asliyyîn gibi hür olmak üzre kitâbete kat‘ edip ol dahi ber vech-i muharrer kabûl eylediğinden sonra meblağ-ı mezbûrun otuz guruşunu yedinden ahz u kabz edip kırk guruşu bâkī kalmışidi hâlâ meblağ-ı bâkī-i mezbûr kırk guruş mütâlebesinden mevsûf-ı mezbûr Ömer’in zimmetini ibrâ-i âm ile ibrâ ve iskāt eyledim min ba‘d mevsûf-ı mezbûr sâir ahrâr-ı asliyyîn gibi hür olup üzerinde velâ-i şer‘îden gayrı hakkım bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Beşe b. Abdullah, Süleyman b. Mehmed, Ahmed Beşe b. Yusuf, Mehmed b. Ahmed, Mustafa b. Şaban.