İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 364 Hüküm no: 345 Orijinal metin no: [66a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman peştemalciler esnafı kethüdalığına Mustafa Ağa’nın tayin edildiği Kethüdâ nasbı Âsitâne-i seniyye’de vâki‘ İslâm peştemalci esnâfının kethüdâları olan Ahmed Ağa kethüdâlık-ı mezkûrdan bu def‘a bi’t-terâzî keff-i yed eylediğine binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâsları ve hâlâ muhtesib-i İstanbul hâcegân-ı Dîvân-ı Hümâyûn’dan Mehmed Emin Faik Efendi’nin re’yi munzam idiği tarafından mürsel çukadârı Ahmed Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb Mustafa Ağa b. Osman nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā semt ü imlâ olundu. Fî 11 Ş sene 1247 Şuhûdü’l-hâl: Ahmed Ağa b. Mehmed, Halil Ağa b. Osman, es-Seyyid Mustafa Ağa b. Ali, Mustafa Ağa b. Süleyman.