İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 364 Hüküm no: 346 Orijinal metin no: [66a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın Bakkal Filibos’dan alacağını tahsil edip yanında rehin olan bakkal gediğini Filibos’a iade ettiği Fekk-i rehn-i bakkāl Derûn-ı hüccetde mezkûretü’l-ism olup zâtı ta‘rîf-i şer‘î ile mu‘arrefe olan Hadice Hanım bt. Abdullah meclis-i şer‘-i şerîf-i enverde kezâlik derûn-ı hüccetde ismi mastûr Bakkāl İncesulu Filibos v. Anaştaş nâm zimmî muvâcehesinde ikrâr-ı tâm ve takrîr-i kelâm edip derûn-ı hüccetde tafsîl ü beyân ve tasrîh ü âyan kılındığı üzere mersûm Filibos zimmî zimmetinde gāibân ani’l-meclis Bakkāl Pavli v. Elisa ve Bratamos v. Lazari zimmîler kefâletleriyle mâlımdan zevcim Mehmed Salih Ağa yediyle istidâne ve kabz eylediği iki bin guruş ve meblağ-ı mezkûrun bâ-devr-i şer‘î üç senelik ilzâm-ı ribhinden işbu târîhe gelince on sekiz aya isâbet eden dört yüz elli guruş ki cem‘an iki bin dört yüz elli guruşu mersûm Filibos zimmî bana edâ ve teslîm eylediğinde ben dahi mersûmun mâlı olup takdîmle yedimde rehin olan mahmiye-i İstanbul’da Ebü’l-feth Sultan Mehmed Han -aleyhi’r-rahmeti ve’l-gufrân- hazretleri câmi‘-i şerîfi avlusu ebvâbından Boyacıkapısı hâricinde kâin yeni Yenidükkân <> denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehm hisse-i şâyi‘asını rehniyetden ba‘de’l-fekk mesfûrun yedine teslîm ve her birimiz âharın yedinden tamâmen ahz u kabz etmem[iz]le min-ba‘d asl-ı mâl-ı mezkûr iki bin guruşdan ve elzem-i ribhiyetden benim mersûm Filibos zimmî zimmetinde bir akçe ve bir habbe hakkım ve alacağım ve altmış sehm âlât-ı lâzıme-i mezkûrda dahi kat‘â alâka ve medhalim kalmayıp mesfûr Filibos zimmînin ke’l-evvel emvâl-i mahzı ve hakk-ı sırfıdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 29 Ramazan sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Tahtacı Salih Ağa, Muhzır Molla Hüseyin.