İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 365 Hüküm no: 347 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tülbentçi Ohannes’nin dükkân gediğini kız kardeşi Antran’a sattığı Tülbentçi mübâya‘ası Mahmiye-i İslambol’da Langa Yenikapısı kurbünde Musalla nezdinde Şeyh Ferhad mahallesinde mütemekkin Tülbentçi Ohannes v. Arakil nâm zimmî meclis-i şer‘-i hatîrde li-ebeveyn kız karındaşı bâ‘isetü’s-sifr Antran nâm Nasrâniye tarafından husûs-ı âti’z-zikrde tasdîka vekîl-i sâbitü’l-vekâlesi Kalpakçı Mıgırdıç v. Artin nâm zimmî muvâcehesinde ikrâr-ı tâm ve takrîr-i kelâm edip nezâret-i Şeyhülislâmî’de âsûde evkāfdan vâlide kethüdâsı esbak merhûm Yusuf Ağa Vakfı musakkafâtından İslambol’da Sultan Bayezid kurbünde Vezneciler Kapısı ittisâlinde vâki‘ bir bâb kârgir hanın tabaka-i ulyâsında kârgir odalardan tarîk-i hâsda Yemenîciler caddesine nâzır köşede vâki‘ beher mâh sekizer guruş kirâlı bir bâb tülbentçi odası derûnunda mevcûde âlât-ı gedik bâ-sûret yedimde müstakıllen mülküm olmağın ben akd-i âti’z-zikrin sudûruna değin ber-minvâl-i muharrer mâlik olduğum âlât ve eşyâ-i gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile kız karındaşım müvekkile-i mersûme Antran Nasrâniyeye bin yedi yüz elli guruşa bey‘ ü temlîk ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin yedi yüz elli guruşu kız karındaşım müşteriye-i müvekkile-i mersûme yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i meşrûh âharın ibrâsını kabûl etmemizle fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp kız karındaşım müvekkile-i mersûme Antran Nasrâniyenin mülk-i müşterâsı ve hakk-ı sırfı olmuşdur ke-emsâlihâ mâlike ve mutasarrıfe olsun dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 5 Şa‘bân sene 1247 Şuhûdü’l-hâl: Hafız İsmail Ağa Kethüdâ-i muhzırân, Çukadâr Ali Ağa b. el-Hâc Mehmed, Muhzır Hüseyin Çelebi, Muhzır Molla Ahmed, Muhzır Molla Halil. Tülbentçi Esteban, Tülbentçi Karabet, Kalpakçı Minas, Kalpakçı Haçador.