İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 366 Hüküm no: 348 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarşı-yı Kebir bekçisi Mehmed Tayyib Ağa’nın tütüncü dükkânı gediğini Ahmed Hurşid Ağa’ya sattığı Tütüncü Mahmiye-i İstanbul’da Esirpazarı nezdinde Hüseyin Ağa mahallesinde sâkin Çarşı-yı Kebîr bekçibaşısı Mehmed Tayyib Ağa b. Mehmed tarafından husûs-ı âti’z-zikrde vekîl olduğu Hafız Ahmed b. Halil ve Mehmed b. Ahmed nâm kimesneler şehâdetleriyle sâbit olan Berber Mustafa Ağa b. Halil meclis-i şer‘-i münîrde devletlü Mehmed Paşa hazretlerinin iç çukadârı işbu bâ‘isü’l-kitâb Ahmed Hurşid Ağa b. Abdullah mahzarında bi’l-vekâle ikrâr-ı tâm ve takrîr-i kelâm edip mahmiye-i mezbûrede Kalpakçılarbaşı’nda İskilib Hanı karşısında Parmakkapı dâhilinde köşebaşında kâin şehriye dört guruş kirâlı Ma‘den kaleminde Balatlı Ali Ağa ismine mukayyed ve mu‘teber bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müvekkilim merkūmun akd-i âti’z-zikrin sudûruna değin yedinde bâ-hüccet-i şer‘iyye mülkü olmağla ben âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Ahmed Hurşid Ağa’ya dört bin guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr dört bin guruşu bana tamâmen def‘ ü teslîm ve ben dahi yedinden bi’l-vekâle ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrda müvekkilim merkūmun aslâ ve kat‘â alâka ve medhali kalmayıp müşteri-i merkūm Ahmed Hurşid Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 14 Şa‘bân sene 1247 Şuhûdü’l-hâl: Kethüdâ Mustafa Kâşif Ağa, Vekili Ünyeli Mehmed Ağa, Yiğitbaşı Hafız Ahmed Ağa, Sâbık Kâtib Mehmed Nuri Efendi, Muhzır Hüseyin Çelebi.