İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 367 Hüküm no: 349 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın tütüncü gediğini Silivrili Mehmed Ağa ile hanımı Hatice’ye sattığı Tütüncü Medîne-i Üsküdar’a tâbi‘ İstavros karyesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Şerife Fâtıma Hanım bt. es-Seyyid Mehmed Said meclis-i şer‘-i münîrde işbu bâ‘isü’l-kitâb kendi nefsinden asıl ve zevcesi kezâlik zâtı mu‘arrefe Şerife Hadice Hatun b. İslâm tarafından husûs-ı âtîde tasdîka vekîl-i şer‘îsi Silivrili el-Hâc Mehmed Ağa b. Ali mahzarında ikrâr-ı tâm ve takrîr-i kelâm edip mahmiye-i İstanbul’da Duhân gümrüğü kurbünde Tulumba sokağında kâin bir tarafdan taşçı mağazası ve bir tarafdan Salih Ağa mağazası ve bir tarafdan tarîk-i hâs ile mahdûd şehriye sekiz guruş kirâlı Ma‘den kaleminde babam es-Seyyid Mehmed Said Ağa ismine mukayyed ve mu‘teber bir bâb tütüncü mağazası derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin yedimde ırsen ve şirâen müstakıllen mülküm olmağla ben ber-minvâl-i muharrer mâlike olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile asıl-ı merkūm el-Hâc Mehmed Ağa ile zevcesi müvekkilesi merkūme Şerife Hadice Hatun’a üç bin beş yüz guruşa ale’l-iştirâk bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i meşrûh iştirâken yedimden iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mecmû‘-ı mezkûr üç bin beş yüz guruşu bana tamâmen def‘ ü teslîm ve ben dahi yedlerinden ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü ibrâ-i âm ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp asıl-ı merkūm el-Hâc Mehmed Ağa ve müvekkile-i merkūme Şerife Hadice Hatun’un iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 14 Ş sene 1247 Şuhûdü’l-hâl: Eş-şâhidûnü’s-sâbikūn.