İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 367 Hüküm no: 350 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Peştemalcioğlu Abraham’ın bakkal dükkânı gediğindeki hissesini Bakkal Vasil, Lefter ve Yorgi’ye sattığı Bakkāl İhrâc-şüd Fî 5 Ramazan sene [1]276 Kaydı ihrâc-şüd Fî 22 Şa‘bân sene [1]310 Âsitâne-i aliyye’de vâki‘ sarrâf tâifesinden Astarcı hanında mütemekkin Peştemalcioğlu Abraham v. Sahak nâm zimmî tarafından husûs-ı âtîde ikrâr ve takrîre vekîl olduğu Ustabaşı Sava v. Anaştaş ve Yuvakim v. Simyon nâm zimmîler şehâdetleriyle sâbit olan diğer Yuvakim v. Lefter meclis-i şer‘-i hatîrde bakkāl tâifesinden işbu bâ‘isü’s-sifr Vasil ve Lefter veledey Bali ve Yorgi v. Marat nâm zimmîler muvâcehelerinde bi’l-vekâle ikrâr-ı tâm ve takrîr-i kelâm edip müvekkilim mersûm Abraham zimmî mahmiye-i mezbûrede Sultan Mehmed Câmi‘-i şerîfi civârında Küçük Karaman nâm mahâlde kasab karşısında çörekçi fırını ittisâlinde Selami Çelebi dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi İsmail Ağa’nın ve mâ‘adâ doksan sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde mülkümüz olmağla ben ber-minvâl-i muharrer mâlik olduğum doksan sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile ve şerîkim mezbûr İsmail Ağa’nın izn ü icâzetiyle mersûmûn Vasil ve Lefter ve Yorgi zimmîlere ale’l-iştirâk sekiz bin iki yüz elli guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr sekiz bin iki yüz elli guruşu mâllarından bana tamâmen def‘ ü teslîm ve ben dahi yedlerinden ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan mersûmûn Vasil ve Lefter ve Yorgi zimmîlerin zimmetlerini kabûlü hâvî ibrâ-i âm ile ibrâ ve iskāt etmemizle fîmâ-ba‘d gedik-i mezkûrda olan doksan sehm hisse-i mezkûremde benim aslâ ve kat‘â alâka ve medhalim kalmayıp müşteriyyûn-ı mersûmûnun mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 Şa‘bân [sene 1247] Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako, Ustabaşı İsak, Kabzımâl Sava, İstefan v. Bratamos.