İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 368 Hüküm no: 351 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Mehmed Said Ağa’nın berber dükkânı gediğini Takohi’ye sattığı Berber Mahmiye-i İstanbul’da Sultan Selim kurbünde Debbâğyunus mahallesinde sâkin Berber es-Seyyid el-Hâc Mehmed Said Ağa b. es-Seyyid Osman nâm kimesne meclis-i şer‘-i münîrde işbu bâ‘isü’<>s-sifr Takohi bt. Zeron nâm Nasrâniyenin sadrî kebîr oğlu ve tarafından husûs-ı âti’l-beyânda tasdîka vekîli Berber Serkiz v. Norsis nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Kapan-ı dakīk kapısı hâricinde kâin Başmuhâsebe kaleminde Tüfenkhâne’de Yako Yahûdi ismine mukayyed ve mu‘teber âhar akāra tebdîl olunan bir bâb berber dükkânından müstahlas beyne’l-hıref gedik ta‘bîr olunur beş ustura ve bir kayış ve bir mir’ât ve bir tarak ve bir mikrâs ve bir cımbız ve iki leğen ve sâir âlât-ı lâzıme-i ma‘lûme akd-i âti’z-zikrin sudûruna değin benim yedimde mülküm olmağın ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mersûme Takohi Nasrâniyeye bin iki yüz yirmi guruşa bey‘ ü temlîk ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin iki yüz yirmi guruşu bana tamâmen def‘ ü teslîm ve ben dahi yedinden ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteriye-i müvekkile-i mersûme Takohi Nasrâniyenin mülk-i müşterâsı ve hakk-ı sırfı olmuşdur dedikde gıbbe’t-tasdîki[‘ş-şer‘î mâ-vaka‘a bi’t-taleb ketb olundu] Fî 23 Şa‘bân [sene 1247] Şuhûdü’l-hâl: Kethüdâ vekîli el-Hâc İbrahim Ağa, Yiğitbaşı el-Hâc Mehmed Nuri Ağa, Kâtib es-Seyyid el-Hâc Abdurrahman Efendi, Du‘âcı İsmail Efendi, Şeyh Mustafa Efendi, Çavuş Mehmed Nuri Ağa.