İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 369 Hüküm no: 352 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadayıfçı ve lokmacı esnafı kethüdalığına Yusuf Ağa’nın tayin edildiği Kethüdâ nasbı Âsitâne-i seniyye’de vâki‘ kadayıfçı ve lokmacı esnâfının kethüdâları olan el-Hâc Mehmed b. İsmail kethüdâlık-ı mezkûrdan bu def‘a azlolunduğuna binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimîn ihbâr ve iltimâsları ve hâlâ muhtesib-i İstanbul hâcegân-ı Dîvân-ı Hümâyûn’dan Mehmed Emin Faik Efendi’nin re’yi munzam idiği tarafından mürsel çukadârı Süleyman Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb Sultan Bayezid’de Buğdaycılar kapısında el-Hâc Yusuf Ağa b. Mehmed nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā sebt ü imlâ olunduğu [olundu] Fî 29 Ş sene 1247 Şuhûdü’l-hâl: Es-seyyid Ömer b. İbrahim, Unkapanı’ndan Mehmed b. Hasan, Tahtakale’den Halil b. İbrahim, Hüseyin Bey b. Mehmed, Hüseyin Usta b. Ahmed Çavuş ve gayruhum.