İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 370 Hüküm no: 354 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahsa’nın menzil ve arsasını daha önce Kuyumcu Meremmetçioğlu Oseb’e satmış olduğunu tescil ettirdiği Galata’da menzil Mahrûse-i Galata’ya muzâfe Beşiktaş nâhiyesine tâbi‘ Kuruçeşme nâm mahâlde mütemekkine Hekim Manil v. Bogos ve Oseb v. Vasil nâm zimmîler ta‘rîfleriyle mu‘arrefe olan Ahsa bt. Artin nâm Nasrâniye meclis-i şer‘-i hatîrde kuyumcu tâifesinden işbu bâ‘isü’s-sifr Meremmetçioğu Oseb v. Andon nâm zimmî muvâcehesinde ikrâr-ı tâm ve takrîr-i kelâm edip mahrûse-i mezkûrede Sultan Bayezid mahallesinde vâki‘ bir tarafdan Komidas zimmî menzili ve bir tarafdan Kiryako zimmî menzili ve bir tarafdan Sultane Nasrâniye menzili ve taraf-ı râbi‘i tarîk-i âm ile mahdûd derûnunda bir bi’r-i mâ ve müştemilât-ı sâireyi muhtevî tûlen ve arzen bi-hesâbı terbî‘î iki yüz yirmi zirâ‘ bir bâb muhterik mülk menzil arsası bin iki yüz yirmi üç senesi Saferi’l-hayrı’nın on ikinci günü târîhiyle müverraha bir kıt‘a hüccet nâtıka olduğu üzere yedimde ırsen ve şirâen mülküm iken ben arsa-i mezkûreyi bin iki yüz yirmi sekiz senesi Cumâdelâhiresi’nin on altıncı günü üç bin beş yüz guruş semen-i medfû‘ ve makbûza Mahmudpaşa Mahkemesi’nde mersûm Oseb zimmîye bey‘ ü temlîk ve mahâllinde teslîm edip lâkin mersûm Oseb zimmî yedine i‘tâ olunan bir kıt‘a mübâya‘a hücceti mersûm Oseb zimmînin menzilinde ve hüccet-i mezkûrenin mukayyed olduğu sicil mahkeme-i mezkûrede bundan akdem vukū‘ bulan harîkde muhterik olmuş olmağla ol vechile mesfûrun yedinde olan senedi zâyi‘ ise de benim arsa-i mezkûrede târîh-i mezkûrdan beri vechen mine’l-vücûh ve sebeben mine’l-esbâb aslâ ve kat‘â alâka ve medhalim olmayıp mersûm Oseb zimmînin mülk-i müşterâsı ve hakk-ı sırfıdır dedikde gıbbe’t-tasdîki[‘ş-şer‘î mâ-vaka‘a bi’t-taleb ketb olundu] Fî 25 Şa‘bân sene 1247 Şuhûdü’l-hâl: Hafız İsmail Ağa b. Mustafa, Ali Ağa b. el-Hâc Mehmed, Muhzır Hüseyin Çelebi b. Yusuf. Vicen v. Anderyas, Oseb v. Vasil, Bedros v. Bogos.