İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 371 Hüküm no: 355 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Ömer Ağa’nın berber dükkânı gediğini Fâtıma Hatun’a sattığı Berber Mahmiye-i İstanbul’da Sultan Selim kurbünde Tercüman Yunus mahallesi sükkânından Berber es-Seyyid el-Hâc Ömer Ağa b. Halil nâm kimesne meclis-i şer‘de mahalle-i mezkûre kurbünde Debbâğyunus mahallesinde sâkine Şerife Fâtıma Hatun bt. el-Hâc Veliyyüddin tarafından husûs-ı âti’l-beyânda tasdîka vekîl-i şer‘îsi es-Seyyid el-Hâc Mehmed Nuri Ağa b. es-Seyyid Osman mahzarında ikrâr-ı tâm ve takrîr-i kelâm edip mahmiye-i mezbûrede Küçükmustafapaşa kurbünde Yenikapı tarîkinde Değirmen çarşısında kâin Başmuhâsebe kaleminde Mustafa Usta ismine mukayyed âhar akāra tahvîl olunan bir bâb berber dükkânından müstahlas akd-i âti’z-zikrin sudûruna değin yedimde mülküm olup beyne’l-hıref gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i merkūme Şerife Fâtıma Hatun’a dokuz yüz elli guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr dokuz yüz elli guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteriye-i müvekkile-i mezbûre Şerife Fâtıma Hatun’un mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şa‘bân sene 1247 Şuhûdü’l-hâl: Kethüdâ vekîli el-Hâc İbrahim Ağa, Kâtib es-Seyyid el-Hâc Abdurrahman Efendi, Şeyh Mustafa Efendi, Du‘âcı vekîli İsmail Efendi, Çavuş Mehmed Nuri Ağa.