İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 372 Hüküm no: 356 Orijinal metin no: [67b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani v. Nikola’nın dükkân gediği hissesini Bakkal Yani v. Kosta’ya sattığı Bakkāl mübâya‘ası Âsitâne-i seniyye’de vâki‘ bakkāl tâifesinden Yani v. Nikola nâm zimmî meclis-i şer‘-i hatîrde yine tâife-i mersûmeden işbu bâ‘isü’s-sifr diğer Yani v. Kosta nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Fener Kapısı hâricinde çeşme karşısında kâin arpacı dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla seksen sehmi mersûm Yani zimmînin ve bâkī kırk sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum kırk sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Yani zimmîye iki bin guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl ve semen-i mezkûr iki bin guruşu bana tamâmen def‘ ü teslîm ve ben dahi yedinden bi’t-tamâm ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i mesfûr Yani zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 2 min-şehri Ramazani’l-mübârek sene 1247 Şuhûdü’l-hâl: Bölükbaşı Abdi Çelebi, Pazarbaşı Süleyman Ağa. Ustabaşı Kiryako v. Vasil, Ustabaşı Ananosti v. Hıristo, Kabzımâl Sava.