İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 373 Hüküm no: 357 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un berber dükkânı gediğini Ayvansaray İskelesi arka hamalları kethüdası Hüseyin Ağa’ya sattığı Berber mübâya‘ası Medîne-i Eyüb’de Bıçakçı Ferhad mahallesinde sâkine Şerife Emine Hatun bt. es-Seyyid Abdurrahman’ın li-ebeveyn er karındaşı ve tarafından husûs-ı âti’l-beyânda vekîl olduğu zâtını ârifân Kömürcü es-Seyyid İbrahim Ağa b. es-Seyyid Mustafa ve Köşe ustası Mehmed Ağa b. Mustafa nâm kimesneler şehâdetleriyle sâbit olan Münâdî es-Seyyid Mustafa Ağa nâm kimesne meclis-i şer‘-i münîrde Ayvansaray İskelesi arka hamalları kethüdâsı işbu bâ‘isü’l-kitâb Hüseyin Ağa b. Davud nâm kimesne mahzarında bi’l-vekâle ikrâr-ı tâm ve takrîr-i kelâm edip medîne-i mezkûrede Eski Yenihamam kurbünde kâin Başmuhâsebe kaleminde el-Hâc Mustafa Usta ismine mukayyed âhar akāra tebdîl olunan bir bâb berber dükkânından müstahlas beyne’l-hıref gedik ta‘bîr olunur âlât-ı lâzıme-i ma‘lûme kız karındaşım ve müvekkilem merkūmenin akd-i âti’z-zikrin sudûruna değin yedinde mülkü olmağla ben gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Hüseyin Ağa’ya bin guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm <> ile ibrâ ve iskāt eyledik fîmâ-ba‘d gedik-i mezkûrda kız karındaşım ve müvekkilem mezbûrenin aslâ ve kat‘â alâka ve medhali kalmayıp müşteri-i merkūm Hüseyin Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şa‘bân sene 1247 Şuhûdü’l-hâl: Eş-şâhidûnü’s-s-sâbikūn. Bir hüccet yukarı