İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 373 Hüküm no: 358 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Bedros’un tütüncü mağazası gediğini Tarsi’ye sattığı Tütüncü mübâya‘ası Medîne-i Üsküdar’da Selâmiye mahallesinde mütemekkin keresteci tâifesinden Bedros v. Babik nâm zimmî meclis-i şer‘-i hatîrde mahmiye-i İstanbul hısnı ebvâbından Cibâli Kapısı hâricinde Seferikoz mahallesinde mütemekkine işbu bâ‘isetü’s-sifr Tarsi bt. Todori nâm Nasrâniyenin li-ebeveyn er karındaşı ve tarafından husûs-ı âti’z-zikrde tasdîka vekîli Eczâcı Todori nâm zimmî muvâcehesinde ikrâr-ı tâm ve takrîr-i kelâm edip İstanbul’da Ketenciler sûku kurbünde Aşir Efendi türbesi nezdinde Taşdirekli mağaza ittisâlinde kâin mâhiye sekiz buçuk guruş kirâ-i kadîmeli bir bâb tütüncü mağazası derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mersûme Tarsi Nasrâniyeye dört bin guruşa bey‘ ü temlîk ve teslîm ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr dört bin guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm âlât-ı gedik-i mezkûrda benim aslâ ve kat‘â alâka ve medhalim kalmayıp müşteriye-i müvekkile-i mersûme Tarsi Nasrâniyenin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 Ramazan sene [12]47 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yiğitbaşı Hafız Ahmed Ağa ve gayruhum. Karamanlı Bedros, Kamanlı İsail.