İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 374 Hüküm no: 359 Orijinal metin no: [68a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cabbarzade Mehmed Celaleddin Bey’in sahibi olduğu Sarılar Çiftliği’ni müştemilatıyla birlikte Sarraf Davidoğlu Oseb’e sattığı Çorlu’da çiftlik mübâya‘ası Dergâh-ı âlî kapıcıbaşılarından Cabbarzâde Mehmed Celaleddin Bey b. el-merhûm Süleyman Bey tarafından husûs-ı âti’l-beyânda âharı tevkîle dahi me’zûn vekîlleri olan sadr-ı Anadolu esbak devletlü inâyetlü Mehmed Hamdullah Efendi hazretleri kıbel-i devletlerinden ber-vech-i âtî ikrâr ve takrîre vekîl olduğu Dağıstanî Hüseyin Efendi b. Mehmed Nebi ve Mustafa Ağa b. Mehmed şehâdetleriyle sâbit olan es-Seyyid Hafız Salih Hakkı Efendi b. es-Seyyid Mehmed meclis-i şer‘-i şerîf-i lâzımü’t-teşrîfde İslambol’da Çakmakçılar kurbünde Büyük Yenihan sarrâflarından işbu râfi‘u’l-kitâb Davidoğlu Oseb v. Karabet nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilim müşârün-ileyh Mehmed Hamdullah Efendi hazretleri müvekkilim mûmâ-ileyh Cabbarzâde Mehmed Celaleddin Bey’in akd-i âti’z-zikrin sudûruna değin silk-i mülkünde münselik emlâkinden olup Vilâyet-i Rumeli’de Çirmen sancağında kâin Çorlu kazâsına tâbi‘ Sarılar nâm karyede vâki‘ lede’l-ahâlî ve’l-cîrân Sarılar Çiftliği denmekle şöhret-i şâyi‘asına mebnî tahdîd ve tavsîfden müstağnî dört bâb oda ve bir kebîr kule ve bir kebîr samanlık ve üç ahır dört anbar ve ittisâlinde bir bâb oda ve matbah ve bir çeşme ve iki kanadlı porta kapıyı müştemil çiftlik ta‘bîr olunur mülk menzil ile derûnunda mevcûde ma‘lûmü’r-re’s hayvânât ve ma‘lûmü’l-keyl hubûbât ve âlât-ı çift ve harâset ve harman yerini ve karye-i mezkûre bağları hilâlinde mevcûd tahmînen üç buçuk dönüm mikdârı ma‘lûmü’l-hudûd bir kıt‘a kürûmu mülk bağını bi-cümletin mâ-yeştemilihû ve yahvîhü tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Oseb zimmîye on iki bin guruşa bi’l-vekâle bey‘ ü temlîk ve mahâllinde kabza taslît ve çiftlik-i mezkûra teba‘iyetle zirâ‘at ve harâset olunur ma‘lûmü’l-hudûd ve’l-kıt‘a tarlaları dahi bâ-ma‘rifet-i sâhib-i arz on iki bin yedi yüz doksan altı guruş bedel mukābelesinde mersûm Oseb zimmîye bi’l-vekâle ferâğ ve tefvîz eylediğimde ol dahi ber-minvâl-i meşrûh iştirâ ve temellük ve tefevvüz ve kabûl edip semen ve bedel-i mezkûr cem‘an yirmi dört bin yedi yüz doksan altı guruşu mersûm Oseb zimmî bana tamâmen def‘ ü teslîm ve ben dahi yedinden bi’l-vekâle tamâmen ve kâmilen ahz u kabz eylediğimden sonra meblağ-ı mecmû‘-ı mezkûru müvekkilim mûmâ-ileyhin mersûm Oseb zimmîye zimmetinde deyni olan meblağ-ı ma‘lûmü’l-mikdârın ol mikdârına takāsen def‘ ü teslîm eylediğimde zimmî-i mesfûr dahi ahz u kabz ve takās ve mahsûb etmeğin akd-i mezkûrun tağrîr ve gabnine ve tarlahâ-yı mezkûrenin ferâğlarına müte‘allika âmme-i da‘vâdan mersûm Oseb zimmînin zimmetini kabûlü hâvî ibrâ-i âm ile ibrâ ve iskāt eyledim fîmâ-ba‘d çiftlik-i mezkûr derûnunda olan bi’l-cümle hayvânât ve hubûbât ve âlât-ı çift ve harâsetlerde ve bağ ve tarlahâ-yı mezbûrelerde müvekkilim mûmâ-ileyh Mehmed Celaleddin Bey’in aslâ ve kat‘â alâka ve medhali kalmayıp mesfûr Oseb zimmînin emlâk-ı müşterâtı ve dâhil-i havza-i tasarrufu olmuşdur dilediği gibi mâlik ve mutasarrıf olsun buyurdular dedikde vekîl-i mukırr-ı merkūm es-Seyyid Hafız Salih Hakkı Efendi’yi sâdır olan cemî‘ kelimât-ı meşrûhasında mersûm Oseb zimmî vicâhen ve şifâhen tahkīk ve tasdîk etmeğin mâ-vaka‘a [bi’t-taleb ketb olundu] Fî 2 Şa‘bân sene 1247 Şuhûdü’l-hâl: Eşrâf-ı kuzâtdan Mehmed Emin Efendi, Duhânî Mehmed Ağa b. Abdullah, Vekîlharc Ali Efendi, Hafız İsmail Ağa Kethüdâ-i muhzırân, Ali Ağa b. el-Hâc Mehmed ve gayruhum.