İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 375 Hüküm no: 360 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniko Nasraniyenin bakkal dükkânı gediği hissesini kardeşi Bakkal Kiryako’ya sattığı Bakkāl Vilâyet-i Rumeli’de Yenişehir-i Fener sancağında vâki‘ Koloz kazâsına tâbi‘ Portalya karyesinde mütemekkine Eleniko bt. Kosta v. Ananosti nâm Nasrâniyenin zevci ve tarafından husûs-ı âti’z-zikrde vekîl olduğu şahsını bilir karye-i mezkûre re‘âyâsından ve bakkāl tâifesinden Ananosti v. Dimo ve Nikola v. Yorgaki nâm zimmîler şehâdetleriyle sâbit olan tüccârdan Dimitri v. Ziso nâm zimmî meclis-i şer‘-i hatîrde müvekkile-i mersûme Eleniko Nasrâniyenin li-ebeveyn er karındaşı işbu bâ‘isü’s-sifr Bakkāl Kiryako nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Şeyh Ebulvefâ meydanında kâin Çavuşoğlu dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yüz altı sehmi karındaşı mesfûr Kiryako zimmînin ve bâkī on dört sehmi dahi akd-i âti’z-zikrin sudûruna değin zevcem ve müvekkilem mersûmenin bâ-hüccet-i şer‘iyye yedlerinde mülkleri olmağla gedik-i mezkûrdan zevcem ve müvekkilem mesfûrenin ber-minvâl-i muharrer mâlike olduğu on dört sehm hisse-i şâyi‘asını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile karındaşı mersûm Kiryako zimmîye sekiz yüz altmış guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr sekiz yüz altmış guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî <> bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d hisse-i şâyi‘a-i mezkûrede zevcem ve müvekkilem mesfûrenin aslâ ve kat‘â alâka ve medhali kalmayıp karındaşı müşteri-i mersûm Kiryako zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 N sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Ananosti, Yazıcı Dimitri, Kabzımâl Sava, Ustabaşı İsak.