İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 376 Hüküm no: 361 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniko’nun iki adet bakkal dükkânı gediğindeki hisselerini kardeşi Bakkal Kiryako’ya sattığı Bakkāl Vilâyet-i Rumeli’de Yenişehir-i Fener sancağında vâki‘ Koloz kazâsına tâbi‘ Portalya karyesinde mütemekkine Eleniko bt. Kosta v. Ananosti nâm Nasrâniyenin zevci ve tarafından husûs-ı âti’l-beyânda vekîl olduğu şahsını bilir karye-i mezkûre re‘âyâsından ve bakkāl tâifesinden Ananosti v. Dimo ve Nikola v. Yorgaki nâm zimmîler şehâdetleriyle sâbit olan tüccârdan Dimitri v. Ziso nâm zimmî meclis-i şer‘-i hatîrde müvekkile-i mersûmenin li-ebeveyn er karındaşı işbu hâmilü’r-rakīm Bakkāl Kiryako nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûre hısnı ebvâbından Kumkapı dâhilinde kâin Hacı Memi dükkânı denmekle meşhûr bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yüz beş buçuk sehmi âharın ve on buçuk sehmi karındaşı mersûm Kiryako zimmînin ve mâ‘adâ dört sehmi ile dükkân-ı mezkûr civârında kâin Hünkâr İmâmı dükkânı denmekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin kezâlik yüz yirmi sehm i‘tibârıyla yetmiş iki sehmi âharın ve otuz dört buçuk sehmi yine mersûm Kiryako zimmînin ve bâkī on üç buçuk sehmi dahi akd-i âti’z-zikrin sudûruna değin zevcem ve müvekkilem mersûme Eleniko Nasrâniyenin bâ-hüccet-i şer‘iyye yedlerinde mülkleri olmağla zevcem ve müvekkilem mesfûrenin mârru’z-zikr Hacı Memi dükkânı gediği âlâtından ber-minvâl-i muharrer mâlike olduğu dört sehm hissesini iki yüz kırk guruşa ve sâlifü’z-zikr Hünkâr İmâmı dükkânı gediği âlâtından dahi mâlike olduğu on üç buçuk sehm hisse-i şâyi‘asını yedi yüz yirmi guruşa tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Kiryako zimmîye bi’l-vekâle bey‘ ü temlîk ve lâyıkı vechile her birini teslîm eylediğimde ol dahi ber-vech-i meşrûh iştirâ ve temellük ve tesellüm ve kabz ve kabûl edip semen-i mezkûr cem‘an dokuz yüz altmış guruşu bana def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm hisse-i şâyi‘a-i mezkûrelerde zevcem ve müvekkilem mesfûrenin aslâ ve kat‘â alâka ve medhali kalmayıp karındaşı müşteri-i mersûm Kiryako zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 N sene 1247 Şuhûdü’l-hâl: Eş-şâhidûnü’s-sâbikūn.