İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 377 Hüküm no: 362 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun ile Mehmed Naim Molla’nın kendilerine miras yoluyla intikal eden değirmeni Değirmenci Şahmişir’e sattıkları Uncu değirmeni İhrâc-şüd Fî 5 S sene [1]251 Mahmiye-i İstanbul’da Çarşambapazarı kurbünde Beyceğiz mahallesi ahâlîsinden olup işbu târîhden üç sene mukaddem Vilâyet-i Rumeli’de Menlik kazâsında hâkimü’ş-şer‘ iken vefât eden eşrâf-ı kuzâtdan Mîzânîzâde es-Seyyid Mehmed Hasib Efendi b. es-Seyyid Halil b. Mustafa’nın verâseti zevce-i menkûha-i metrûkesi Ümmügülsüm Hatun bt. Abdullah ile zevce-i uhrâsından mütevellid sulbî sagīr oğlu es-Seyyid Mehmed Naim Molla’ya münhasıra ve mesele-i mîrâsları sekiz sehmden olup sihâm-ı mezbûreden bir sehmi zevce-i mezbûreye ve yedi sehmi sagīr-i merkūma isâbeti tahakkukundan sonra vârisân-ı mezbûrândan zevce-i merkūme Ümmügülsüm Hatun tarafından husûs-ı âti’l-beyânda vekîl-i sâbitü’l-vekâlesi ve sagīr-i merkūm es-Seyyid Mehmed Naim Molla’nın bâ-hüccet vasiyy-i mansûbu kısmet-i askeriye muhzırânından İbrahim İbiş Ağa b. Abdullah meclis-i şer‘-i şerîf-i enverde değirmenci tâifesinden işbu hâmilü’s-sifr Şahmişir v. Ohan nâm zimmî muvâcehesinde bi’l-vekâle ve bi’l-vesâye ikrâr-ı tâm ve takrîr-i kelâm edip mahmiye-i mezbûrede Samatya kurbünde Sancakdârhayreddin mahallesinde Ağa Hamamı nezdinde Veli Ağa değirmeni ittisâlinde kâin iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur eşyâ ve âlât-ı lâzıme-i ma‘lûme müteveffâ-yı mezbûr es-Seyyid Mehmed Hasib Efendi’nin hayatında ile’l-vefâtihî yedinde mülkü ve ba‘de’l-vefât zevcesi müvekkilem merkūme Ümmügülsüm Hatun ile vasîsi olduğum sagīr-i merkūma ber-tashîh-i mezkûr mevrûs oldukdan sonra gedik-i mezkûr bâ-yed-i münâdî beyne’t-tâlibîn lede’l-müzâyede ve gıbbe’l-inkıtâ‘i’r-rağbe [69a] dört bin beş yüz guruşda mesfûr Şahmişir zimmî üzerinde karâr edip tâlib-i âharları keff-i yed edip ve meblağ-ı mezkûr gedik-i merkūmun el-yevm semen-i misli idiği bi’l-ihbâ[r] zâhir ve mütehakkık olmağla ben gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Şahmişir zimmîye dört bin beş yüz guruşa bi’l-vekâle ve bi’l-vesâye bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eyledikden sonra semen-i mezkûr dört bin beş yüz guruşu müşteri-i mersûm Şahmişir zimmî bana tamâmen def‘ ü teslîm ve ben dahi yedinden bi’l-vekâle ve bi’l-vesâye ahz u kabz ve müteveffâ-yı merkūmun defter-i kassâmına idhâl etmemle fîmâ-ba‘d gedik-i mezkûrda müvekkilem merkūme Ümmügülsüm Hatun ile vasîsi olduğum sagīr-i mezbûr es-Seyyid Mehmed Naim Molla’nın aslâ ve kat‘â alâka ve medhalleri kalmayıp müşteri-i mesfûr Şahmişir zimmînin mülk-i müşterâsı ve hakk-ı sırfı olmuşdur ke-emsâlihi mâlik ve mutasarrıf olsun dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 26 Ş sene [1]247 Şuhûdü’l-hâl: Muhzır Molla Halil, Çukadâr Ali Ağa, Salıcı İsmail Ağa, Uncular Kethüdâsı Mehmed İzzet Efendi, Ekmekçiler Kethüdâsı Osman Ağa ve gayruhum.