İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 378 Hüküm no: 363 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Dimitri’nin bostan gediği hissesini yarısını hanımı Evine’ye sattığı Bostan mübâya‘ası Mahmiye-i İstanbul’da Hırka-i şerîf kurbünde Kabakulak mahallesinde mütemekkin Bahçıvan Dimitri v. Tanaş nâm zimmî meclis-i şer‘-i hatîrde hâlâ zevcesi işbu bâ‘isetü’s-sifr Evine bt. Bagon nâm Nasrâniye muvâcehesinde ikrâr-ı tâm ve takrîr-i kelâm edip mahalle-i mezkûrede kâin bir tarafdan Hüseyin Ağa bahçesi ve bir tarafdan Ahmed bahçesi ve bir tarafdan Arnavud bahçesi ve bir tarafdan tarîk-i hâs ile mahdûd bir bostan derûnunda mevcûde beyne’l-esnâf gedik ta‘bîr olunur iki bel ve iki tarak ve bir çapa ve sâir âlât-ı lâzıme-i ma‘lûme akd-i âti’z-zikrin sudûruna değin yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûrun nısf hissesini yedimde ibkā ve nısf-ı âharını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcem mersûm Evine Nasrâniyeye üç yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr üç yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d âlât-ı gedik-i mezkûrun nısf hissesinde benim aslâ ve kat‘â alâka ve medhalim kalmayıp zevcem müşteriye-i mersûme Evine Nasrâniyenin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 29 Ş sene [1]247 Şuhûdü’l-hâl: Kethüdâ Hüseyin Ağa, Yazıcı Hafız Mehmed Efendi. Yiğitbaşı Yani v. Dimitri zimmî, Dimitri v. Kosta zimmî, Markor v. Miho zimmî.