İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 379 Hüküm no: 364 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Mehmed Efendi’nin helvacı ve turşucu gediğini helvacı ve turşucu esnafından İsmail ve Mustafa’ya sattığı Helvacı ve turşucu mübâya‘ası Mahmiye-i İstanbul’da Koska kurbünde Mimâr Kemaleddin mahallesinde sâkin Esirci Mehmed Efendi b. İbrahim nâm kimesne meclis-i şer‘-i münîrde helvacı ve turşucu esnâfından işbu bâ‘isü’l-vesîka İsmail b. Ahmed ve Mustafa b. İbrahim nâm kimesneler mahzarlarında ikrâr-ı tâm ve takrîr-i kelâm edip mahmiye-i mezbûrede Samatyakapısı dâhilinde vâki‘ ma‘lûmü’l-hudûd bir bâb helvacı ve turşucu dükkânı derûnunda mevcûde beyne’l-esnâf gedik ta‘bîr olunur iki kazgan ve iki kürek ve bir mermer taşı ve üç kebîr fıçı ve bir bıçak ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūmân İsmail ve Mustafa’ya on üç bin iki yüz guruşa ale’l-iştirâk bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer yedimden iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr on üç bin iki yüz guruşu bana tamâmen def‘ ü teslîm ve ben dahi yedlerinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteriyân-ı mezbûrân İsmail ve Mustafa’nın iştirâken mülk-i müşterâları ve hakk-ı sırfları olmuşdur dedikde gıbbe’t-tasâduki’ş-şer‘î [mâ-vaka‘a bi’t-taleb ketb olundu] Fî-selhi Ş sene [1]247 Şuhûdü’l-hâl: Kethüdâ Receb Ağa, Yiğitbaşı Halil Ağa, Samatyalı Hüseyin Ağa, es-Seyyid Ahmed Usta, es-Seyyid Ömer Usta, es-Seyyid Abdullah Usta, es-Seyyid Yakub Usta ve gayruhum.