İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 380 Hüküm no: 365 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail ile Mustafa’nın Esirci Mehmed Efendi’den aldıkları borca karşılık rehin verdikleri ve geri aldıkları Helvacı gediği Âsitâne-i aliyye’de vâki‘ helvacı ve turşucu esnâfından İsmail b. Ahmed ve Mustafa b. İbrahim nâm kimesnelerden her biri meclis-i şer‘-i münîrde İstanbul’da Koska kurbünde Mimâr Kemaleddin mahallesi sükkânından Esirci Mehmed Efendi b. İbrahim nâm kimesne muvâcehesinde ikrâr-ı tâm ve takrîr-i kelâm edip işbu târîh-i kitâb günü merkūm Mehmed Efendi’nin mâlından ve yedinden iktirâz ve kabz [ve] umûrumuza sarfla istihlâk eylediğimiz beş bin guruş ile semeni işbu târîhden bir sene tamâmına değin müeccel ve mev‘ûd yine merkūm Mehmed Efendi’nin mâlından bi’l-ma‘iyye bi-safkatin vâhidetin iştirâ ve kabz eylediğimiz bir cild Ali Efendi ve bir cild Behçetü’l-fetâvâ kitâbları semeninden dahi yedi yüz elli guruş ki cem‘an beş bin yedi yüz elli guruş mezbûr Mehmed Efendi’ye zimmetimiz[de] sahîhan deynimiz olup mukābelesinde İstanbul hısnı ebvâbından Samatyakapısı dâhilinde vâki‘ ma‘lûmü’l-hudûd bir bâb helvacı ve turşucu dükkânı derûnunda mevcûde beyne’l-esnâf gedik [ta‘bîr] olunur ale’l-iştirâk mâlikler olduğumuz âlât-ı lâzıme-i ma‘lûmemizi rehin vaz‘ ve merkūm Mehmed Efendi yedine teslîm eylediğimizde ol dahi ber-minvâl-i muharrer irtihân ve tesellüm ve kabûl eyledikden sonra âlât-ı gedik-i mezkûru li-ecli’l-isti‘mâl bize i‘âre ve teslîm eyledi dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî-selhi Ş sene [1]247 Şuhûdü’l-hâl: Kethüdâ Receb Ağa, Yiğitbaşı Halil Ağa, es-Seyyid Yakub Ağa, es-Seyyid Ömer Ağa.