İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 381 Hüküm no: 366 Orijinal metin no: [69a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı bakkal Kaçiko Dimitri’nin bakkal gediği hissesini Bakkal Todori’ye sattığı Bakkāl Âsitâne-i aliyye’de vâki‘ yağcı bakkāl tâifesinden Kaçiko Dimitri v. Panayot nâm zimmî meclis-i şer‘-i hatîrde yine tâife-i mersûmeden işbu bâ‘isü’s-sifr Todori v. Apostol nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Cumartesipazarı nezdinde Alipaşa nâm mahâlde kâin Hasan Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk buçuk sehmi Bratamos zimmînin ve bâkī yetmiş dokuz buçuk sehmi akd-i âti’z-zikrin sudûruna değin benim yedimizde mülkümüz olmağla [69b] ben ber-minvâl-i muharrer mâlik olduğum yetmiş dokuz buçuk sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide <> ve şerîkim mersûm Bratamos zimmînin izn ü icâzetiyle mersûm Todori zimmîye dört bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr dört bin guruşu bana def‘ ü teslîm ve ben dahi yedinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrun hisse-i mezkûresinde benim aslâ ve kat‘â alâka ve medhalim kalmayıp müşteri-i mersûm Todori zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 17 N sene [1]247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Ananosti, Ustabaşı Kiryako, Kabzımâl Sava, Yazıcı Yani.