İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 381 Hüküm no: 367 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İncesulu bakkal Filibos’un bakkal gediğindeki hissesini Movisi, İstavri ve Togodoş’a sattığı Bakkāl İhrâc Fî 16 Ra sene [1]255 Âsitâne-i aliyye’de vâki‘ bakkāl tâifesinden İncesulu Filibos v. Anaştaş nâm zimmî meclis-i şer‘-i hatîrde yine tâife-i mersûmeden kendi nefsinden asıl ve İstavri v. İstefan ve Togodoş v. Lefter nâm zimmîler taraflarından husûs-ı âti’l-beyânda tasdîka vekîlleri olan işbu bâ‘isü’s-sifr Movisi v. Todori nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Ebulfeth Sultan Mehmed Han Câmi‘-i şerîfi avlusu ebvâbından Boyacıkapısı hâricinde kâin Yeni dükkân denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme yüz yirmi sehm i‘tibârıyla otuz sehmi müvekkil-i mersûm İstavri zimmînin ve otuz sehmi müvekkil-i mersûm Togodoş zimmînin ve mâ‘adâ altmış sehmi dahi akd-i âti’z-zikrin sudûruna değin benim yedimizde bâ-hüccet-i şer‘iyye şâyi‘an mülkümüz olmağla ben ber-minvâl-i muharrer mâlik olduğum altmış sehm hisse-i şâyi‘amın kırk sehmini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile asıl-ı mesfûr Movisi zimmîye üç bin guruşa ve on sehmini müvekkil-i mersûm İstavri zimmîye yedi yüz elli guruşa ve on sehmini müvekkil-i mesfûr Togodoş zimmîye yedi yüz elli guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden (eylediklerinden) sonra semeni olan cem‘an dört bin beş yüz guruşu müşterûn-ı asıl ve müvekkilân-ı mesfûrûn bana tamâmen def‘ ü teslîm ve ben dahi yedlerinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp kırk sehmi asıl-ı mersûm Movisi zimmînin hâlen ve kırkar sehmi dahi müvekkilân-ı mesfûrân İstavri ve Togodoş zimmîlerin mukaddemâ ve hâlen mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 24 Ramazan sene 1247 Şuhûdü’l-hâl: Eş-şâhidûnü’s-sâbikūn.