İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 382 Hüküm no: 368 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikoli ile kardeşleri ve diğer şahısların bakkal dükkânı gediğindeki hisselerini Bakkal Dimitri’ye sattıkları Bakkāl Hacı Memi dükkânı Vilâyet-i Rumeli’de Yenişehir-i Fener kazâsına muzâfe Ağrafe nâhiyesi re‘âyâsından olup kendi nefsinden asıl ve li-ebeveyn er <> karındaşları Kostandi ve Yani zimmîler ve Maryora ve Eleni evlâd-ı Dimitri Nasrâniyeler ile Vangeli bt. Tanaş nâm Nasrâniye taraflarından husûs-ı âtîde vekîlleri olduğu eşhâs-ı mersûmâtı bilir Papasoğlu Kostandi v. Yorgaki ve Dimitri v. diğer Yorgaki nâm zimmîler şehâdetleriyle sâbit olan Nikoli nâm zimmî ve kezâlik kendi nefsinden asıl ve li-ebeveyn kız karındaşları Lumice ve Marya ve Katrine benât-ı Yorgaki nâm Nasrâniyeler ile Yani zimmî ve diğer Eleni nâm Nasrâniye veledey Kosta taraflarından ber-vech-i âtî vekîlleri olduğu yine şâhidân-ı mersûmân şehâdetleriyle sâbit olan Dimitri ve kezâlik kendi nefsinden asıl ve li-ebeveyn kız karındaşları Seryana ve Marika ve Kadinko ve âhar Eleni evlâd-ı Kiriç nâm Nasrâniyeler taraflarından husûs-ı câîde vekîlleri olduğu yine şâhidân-ı mesfûrân şehâdetleriyle sâbit olan başka Nikoli nâm zimmîlerden her biri meclis-i şer‘-i hatîrde bakkāl tâifesinden işbu bâ‘isü’s-sifr Dimitri v. Varsemi nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip İstanbul hısnı ebvâbından Kumkapı dâhilinde köşebaşında kâin Hacı Memi dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yirmi yedi sehmi mersûm Dimitri zimmînin ve on dört buçuk sehmi Kiryako v. Kosta zimmînin ve yirmi iki buçuk sehmi bizim ve müvekkillerimiz mersûmûnun ve mâ‘adâ altmış beş sehmi âharın yedimizde şâyi‘an mülklerimiz olmağla biz gedik-i mezkûrdan akd-i âti’z-zikrin sudûruna değin mâlikler olduğumuz mârru’z-zikr yirmi iki buçuk sehm hisse-i şâyi‘ayı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîklerimiz gāibûn-ı mesfûrûnun izn ü icâzetleriyle mersûm Dimitri zimmîye üç bin guruşa bi’l-asâle ve bi’l-vekâle bey‘ ü temlîk ve vech-i lâyıkı üzere teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr üç bin guruşu müşteri-i mesfûr Dimitri zimmî bize tamâmen def‘ ü teslîm ve biz dahi yedinden bi’l-asâle ve bi’l-vekâle ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d gedik-i mezkûrun yirmi iki buçuk sehm hisse-i şâyi‘asında bizim ve müvekkillerimiz mersûmûnun aslâ ve kat‘â alâka ve medhallerimiz kalmayıp ol vechile gedik-i mezkûrun yirmi yedi sehmi mukaddemâ ve yirmi iki buçuk sehmi hâlâ ki cem‘an kırk dokuz buçuk sehm mesfûr Dimitri zimmînin mülk-i mahz ve hakk-ı sırfıdır dediklerinde mukırrûn-ı mesfûrûn Nikoli ve diğer Nikoli ve Dimitri [70a] zimmîlerin bi’l-cümle sâdır olan kelimât-ı meşrûhasını mersûm Dimitri zimmî vicâhen [ve] şifâhen tahkīk ve tasdîk etmeğin mâ-vaka‘a [bi’t-taleb ketb olundu] Fî 25 Ramazan sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Muhzır Hüseyin Çelebi. Ustabaşı Ananosti, Ustabaşı İsak, Ustabaşı İstefan, Ustabaşı Dimitri, Ustabaşı Zaharya, Ustabaşı Yorgi, Ustabaşı Dimitri, Gümrükönü’nde Kostandi.