İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 384 Hüküm no: 369 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasibe Hatun ile Mehmed Salih Ağa’nın, Pirinççi Abdullah Ağa’nın varisleri olduklarını ispat ettikleri Bakkāl ve pirinççi ihbârı Mahmiye-i İstanbul’da Hocapaşa kurbünde Emir Câmi‘-i şerîfi mahallesinde sâkin iken bundan akdem vefât eden Pirinççi Abdullah Ağa b. Mehmed’in verâseti zevce-i menkûha-i metrûkesi Hasibe Hatun bt. İsmail ile li-ebeveyn er karındaşı oğlu es-Seyyid el-Hâc Mehmed Salih Ağa b. Ali’ye münhasıra ve mesele-i mîrâsları dört sehmden olup sihâm-ı mezbûreden bir sehmi zevce-i <> mezbûreye ve üç sehmi merkūm es-Seyyid el-Hâc Mehmed Salih Ağa’ya isâbeti tahakkukundan sonra vârisân-ı mezbûrândan işbu bâ‘isü’l-kitâb merkūm es-Seyyid el-Hâc Mehmed Salih Ağa meclis-i şer‘-i şerîf-i enverde zevce-i mezbûre Hasibe Hatun tarafından ber-vech-i âtî vekîl olduğu zâtını ârifân es-Seyyid Hasan Ağa b. es-Seyyid Musa ve es-Seyyid Süleyman Ağa b. es-Seyyid el-Hâc İsmail haberleriyle zâhir olan es-Seyyid Ahmed Ağa b. İbrahim hâzır olduğu hâlde bi’l-verâse takrîr-i kelâm ve bast ani’l-merâm edip mahmiye-i mezbûrede Ayasofya-i Kebîr kurbünde Dörtyolağzı’nda kâin Hacı Bekir dükkânı denmekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme bin iki yüz otuz sekiz senesi şehr-i Rebî‘ülâhiri’nin selhi târîhiyle müverraha bir kıt‘a ve mahmiye-i mahkiye hısnı ebvâbından Bahçekapısı hâricinde hatab anbarı nezdinde Kavalalı el-Hâc İbrahim Ağa ve Kiryako zimmî mağazaları beyninde kâin <> beher mâh on altı guruş kirâ-i kadîmeli iki kepenk bir bâb pirinççi mağazası derûnunda mevcûde kezâlik beyne’l-esnâf gedik ta‘bîr olunur âlât-ı lâzıme-i ma‘lûme sene-i merkūme Zilka‘detü’ş-şerîfesi’nin yirmi sekizinci günü târîhiyle müverraha bir kıt‘a ki cem‘an iki kıt‘a hüccet-i şer‘iyye nâtıka olduğu üzere ammim ve mûrisimiz müteveffâ mezbûr Abdullah Ağa’nın hayatında ile’l-vefât yedinde müstakıllen mülkü ve ba‘de vefâtihî ber-tashîh-i merkūm benimle zevcesi müvekkile-i mezbûreye mevrûs olup lâkin zikr olunan gedikler ber-minvâl-i muharrer yedimizde mülk-i mevrûsumuz olduğunu nâtık sened-i şer‘î olmamağla husûs-ı mezkûr erbâb-ı vukūfdan istihbâr olunup kıbel-i şer‘den yedimize bir kıt‘a hüccet-i şer‘iyye i‘tâ olunmak benim ve zevcesi müvekkile-i merkūme Hasibe Hatun’dan her birimizin matlûbumuzdur dedikde husûs-ı mezkûr merkūm es-Seyyid el-Hâc Mehmed Salih Ağa’nın takrîri üzere olduğunu vekîl-i hâzır-ı mezbûr es-Seyyid Ahmed Ağa tasdîk ve zeyl-i kitâbda mektûbü’l-esâmî sikāt-ı Müslimîn dahi alâ-tarîkı’ş-şehâde ihbâr ve tahkīk etmeleriyle hıfzan li’l- makāl işbu vesîka-i enîka ketb ü imlâ olundu. Fî 27 Ramazan sene 1247 Şuhûdü’l-hâl: Pazarbaşı Süleyman Ağa, Pazarbaşı vekîli İbrahim Edhem Ağa, Bölükbaşı Abdi Çelebi, es-Seyyid Hasan Ağa, es-Seyyid Süleyman Ağa ve gayruhum.