İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 385 Hüküm no: 370 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Tarifnus ve kardeşi Abraham ile Karagöz’ün bakkal dükkânı gediği hisselerini sattıkları Bakkāl gediği mübâya‘ası İhrâc-şüd Fî 25 Zilhicce sene 1257 Âsitâne-i seniyye’de vâki‘ bakkāl tâifesinden Tarifnus ve Abraham veledey Dimitri ve Karagöz v. Yuvan nâm zimmîlerden her biri meclis-i şer‘-i münîrde yine tâife-i mersûmeden işbu bâ‘isü’s-sifr Sava v. İsak ve diğer Sava v. Togodoş nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûrede Ma‘cûnî Kasım mahallesinde vâki‘ Hüseyin Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla elli iki buçuk sehmi mersûm Tarifnus zimmî benim ve yirmi iki buçuk sehmi Abraham zimmî benim ve kırk beş sehmi Karagöz zimmî benim akd-i âti’z-zikrin sudûruna değin yedimizde bâ-hüccet-i şer‘iyye iştirâken mülkümüz olmağla biz gedik-i mezkûrdan ber-minvâl-i muharrer mâlikler olduğumuz hisse-i şâyi‘a-i mezkûremizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmân Sava ve diğer Sava zimmîler[e] bin yedi yüz guruşa ale’l-iştirâk bey‘ ü temlîk ve her birine vech-i lâyıkı üzere teslîm eylediğimizde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr bin yedi yüz guruşu mersûmân bize def‘ ü teslîm ve biz dahi yedlerinden tamâmen ve kâmilen ahz u kabz ve ba‘de’l-hısas iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda olan hisselerimizde bizim aslâ ve kat‘â alâka ve medhalimiz kalmayıp müşteriyân-ı mersûmân Sava ve diğer Sava zimmîlerin mülk-i müşterâları ve hakk-ı sırfları olmuşdur dediklerinde gıbbe’t-tasâduki’ş-şer‘î mâ-vaka‘a bi’t-taleb ketb olundu. Fî 10 L sene [1]247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı İsak zimmî, Ustabaşı Kiryako zimmî, Ustabaşı Vasil zimmî, Yazıcı Yani zimmî.