İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 385 Hüküm no: 371 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı İstefan’ın bakkal dükkânı gediğindeki yirmi sehm hissesini Bakkal Lazari’ye sattığı Bakkāl mübâya‘ası Mahmiye-i İstanbul hısnı ebvâbından Samatyakapısı dâhilinde Mirahur mahallesinde mütemekkin Sandalcı İstefan v. Uğurlu nâm zimmî tarafından husûs-ı âti’l-beyânda vekîl olduğu Bakkāl Ananya v. Anaştaş ve Bratamos v. İlya nâm zimmîler şehâdetleriyle sâbit olan Bakkāl Mai v. Kiryako nâm zimmî meclis-i şer‘-i hatîrde işbu bâ‘isü’s-sifr Bakkāl Lazari v. diğer Kiryako nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i <<İstanbul’da>> mezbûre hısnı ebvâbından Yedikule hâricinde vâki‘ Budak Çorbacı dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Vasil zimmînin ve otuz sehmi Ananya ve Dimitri zimmîlerin ve otuz sehmi müvekkilim mesfûr İstefan zimmînin zevcesi Kıymet Nasrâniyenin ve yirmi sehmi dahi müvekkilim mesfûr İstefan zimmînin akd-i âti’z-zikrin sudûruna değin yedlerinde mülkleri olmağla müvekkilim mesfûr İstefan zimmînin gedik-i mezkûrdan ber-minvâl-i muharrer mâlik olduğu yirmi sehm hisse-i şâyi‘a-i mezkûresini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Lazari zimmîye bin yedi yüz altmış altı guruş yirmi yedi paraya bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin yedi yüz altmış altı guruş yirmi yedi parayı bana def‘ ü teslîm ve ben dahi yedinden bi’l-vekâle tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d gedik-i mezkûrun ber-i‘tibâr-ı merkūm yirmi sehm hissesinde müvekkilim mersûm İstefan zimmînin aslâ ve kat‘â alâka ve medhali kalmayıp müşteri-i mersûm Lazari zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdiki’ş-şer‘î mâ-vaka‘a bi’t-taleb ketb olundu] Fî 29 Ramazan sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Ustabaşı Kiryako, Kabzımâl Sava, Yazıcı Yani.