İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 386 Hüküm no: 372 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı İstefan’ın bakkal dükkânı gediğindeki on sehm hissesini Marine’ye sattığı Bakkāl mübâya‘ası Mahmiye-i İstanbul hısnı ebvâbından Samatyakapısı dâhilinde Mirahur mahallesinde mütemekkin Sandalcı İstefan v. Uğurlu nâm zimmî tarafından husûs-ı âti’l-beyânda vekîl olduğu Bakkāl Ananya v. Anaştaş ve Bratamos v. İlya nâm zimmîler şehâdetleriyle sâbit olan Bakkāl Mai v. Kiryako nâm zimmî meclis-i şer‘-i hatîrde işbu bâ‘isetü’s-sifr Marine v. Eftim nâm Nasrâniyenin zevci ve tarafından husûs-ı âtîde tasdîka vekîli Bakkāl Vasil v. Yuvan nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûre hısnı ebvâbından Yedikule hâricinde vâki‘ Budak Çorbacı dükkânı denmekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi vekîl-i mersûm Vasil zimmînin ve otuz sehmi Ananya ve Dimitri zimmîlerin ve otuz sehmi müvekkilim mersûm İstefan zimmînin zevcesi Kıymet Nasrâniyenin ve yirmi sehmi işbu hâzır bi’l-meclis Lazari zimmînin ve on sehmi dahi müvekkilim mersûm İstefan zimmînin akd-i âti’z-zikrin sudûruna değin yedlerinde mülkleri olmağla müvekkilim mesfûr İstefan zimmînin gedik-i mezkûrdan ber-minvâl-i muharrer mâlik olduğu <> on sehm hisse-i şâyi‘a-i mezkûresini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ müvekkile-i mersûme Marine Nasrâniyeye sekiz yüz seksen üç guruş on üç paraya bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr sekiz yüz seksen üç guruş on üç parayı müvekkile-i mersûme bana tamâmen def‘ ü teslîm ve ben dahi yedinden bi’l-vekâle bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d müvekkilim mersûmun ber-i‘tibâr-ı merkūm gedik-i mezkûrun on sehm hisse-i şâyi‘asında aslâ ve kat‘â alâka ve medhali kalmayıp müşteriye-i müvekkile-i mersûme Marine Nasrâniyenin mülk-i müşterâsı ve hakk-ı sırfı olmuşdur dedikde gıbbe[‘t-tasdiki’ş-şer‘î mâ-vaka‘a bi’t-taleb ketb olundu] Fî 29 N sene [12]47 Şuhûdü’l-hâl: Eş-şâhidûnü’s-sâbikūn.