Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 433 Hüküm no: 511 Orijinal metin no: [83a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kapıcı Dede Vakfı’ndan kiralanan evin tamir masrafının tespiti Mahmiye-i İstanbul’da Hoca Üveys mahallesinde sâkin es-Seyyid Mustafa b. es-Seyyid Mehmed nâm kimesne meclis-i şer‘-i şerîf-i enverde takrîr-i kelâm edip merhûm Kapıcı Dede vakfından olup mahalle-i mezbûrede vâki‘ üç tarafdan Osman Ağa türbesi ve bir tarafdan tarîk-i âm ile mahdûd fevkānî üç oda ve bir sofa ve tahtânî iki oda ve kenîfi müştemil menzil icâre-i mu‘accele ve yevmî iki akçe ücret-i müeccele ile yedinde olan mütevellî temessükü nâtık olduğu üzre taht-ı tasarrufumda olup lâkin mürûr-ı eyyâm ile harâbe müşrif olmağla izn-i mütevellî ile mu‘accelesine mahsûb olmak üzre kendi malım ile imâret ve meremmet etmekle hâlâ kıbel-i şer‘den üzerine varılıp masrûfumun mertebe-i tahammülü tahmîn-i sahîh ile tahmîn ve keşf ve takvîm olunmak matlûbumdur deyûp buyruldu-yı şerîf dahi ibrâz etmekle imtisâlen-leh savb-ı şer‘den Mehmed Efendi b. Mehmed irsâl olunup ol dahi hâssa mi‘mârlarından Mehmed Halîfe b. Abdullah ve Ahmed b. Mehmed ve zeyl-i kitâbda muharrerü’l-esâmî müslimîn ile menzil-i mezbûrun üzerine varıp mi‘mârân-ı mezkûrân vakf-ı mezbûr mütevellîsi olan İmâ[m] Abdüllatîf Efendi b. el-Hâc Halil muvâcehesinde keşf ve mesâha eylediklerinde menzil-i mezbûru tarîk ve türbe tarafından fevkānî bir bâb odanın tûlen ve arzen bi hesâb-ı terbî‘î on beş zirâ‘ ve müceddeden sakfının her zirâ‘ı ellişer akçeden yedi yüz elli akçe ve on zirâ‘ müceddeden kirpi saçağının zirâ‘ı yüzer akçeden bin akçe ve bi hesâb-ı mezkûr kırk sekiz zirâ‘ müceddeden tav‘an ma‘a nakışlar? boyası ve sülügen ... ? ve şişeleriyle zirâ‘ı kırkar akçeden bin dokuz yüz yirmi akçeden beş yüz akçe ve yedi gelir sekiz akçeden beş yüz altmış akçe ve bir mükemmel ocak sekiz yüz akçe ve tahta kaplama zirâ‘ bir münakkaş sagīr kafes altmışar akçeden [83b] üç yüz altmış akçe ve bir münakkaş kapaklı musandıra altı yüz akçe ve bir kapı yüz yirmi akçe ve birisi sekiz zirâ‘ sofanın zirâ‘ı otuz akçeden iki yüz kırk akçe ve iki oluk iki yüz akçe ve terbî‘î kırk beş zirâ‘ kiremid akdarması ma‘a meremmet zirâ‘ı üçer akçeden yüz otuz beş akçe ve şehnişîn altında dört desteklik her biri kırk akçeden yüz altmış akçe ve terbî‘î on iki zirâ‘ taş duvarın zirâ‘ı sekiz akçeden dokuz yüz altmış akçe def‘a terbî‘î yüz kırk dört zirâ‘ sakf akdarmasının meremmetiyle zirâ‘ı üçer akçeden dört yüz otuz iki akçe on aded nerdübân basamağı yüz akçe ve terbî‘î yirmi zirâ‘ tahta döşeme ve …? zirâ‘ı yirmişer akçeden dört yüz akçe ve iki sandık dolab dört yüz akçe ve sofa beşer gelir sekiz akçeden dört yüz akçe ve altı zirâ‘ sülügen boyalı yük kapağının zirâ‘ı altmış akçeden üç yüz altmış akçe mezbûr elli zirâ‘ aşı boyalı tahta perdeleri zirâ‘ı dörder akçeden altı yüz akçe ve terbî‘î üç yüz zirâ‘ sofanın zirâ‘ı birer akçeden üç yüz akçe ve iç? mertek kilidi yedi yüz elli akçe ve dört yağmurluk şemsiyesi ikişer yüz akçe ki cem‘an işbu imâret ve meremmet yirmi bin iki yüz kırk yedi akçe ile ancak olur deyû mi‘mârân-ı mezkûrân icmâ‘ ve ittifâk eylediklerinde vâki‘ hâli Mevlânâ-yı mezbûr mahallinde tahrîr ve ba‘dehû İsmail b. Abdullah ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Efendi el-İmâm, es-Seyyid Mehmed Efendi el-Müezzin, Abdüllatîf Efendi imâm-ı Sofular, Mustafa Çelebi b. Receb, Mehmed Efendi nâzır-ı vakf.