Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 434 Hüküm no: 512 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Hüseyin’in evini Mustafa Efendi’ye satması Husûs-ı âti’l-beyânın mahallinde ketb u tahrîri iltimâs olmağın savb-ı şer‘-i şerîf-i enverden Mevlânâ Abdullah Efendi b. Veli irsâl olunup ol dahi mahmiye-i İstanbul’da Harâccı Muhyiddin mahallesinde sâkin Istabl-ı âmire’de kâtib olan umdetü’t-tahrîr ve’r-rakam Mustafa Efendi b. Hüseyin’in menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i ma‘kūd-ı mezkûrda bâ‘isü hâze’l-kitâb mûmâ-ileyh Mustafa Efendi mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan benim âhar mülküm ve bir tarafdan ba‘zan İbrahim Efendi ve ba‘zan mûmâ-ileyh Mustafa Efendi mülkleri ve bir tarafından tarîk-i hâs ve bir tarafından tarîk-i âmla mahdûd bir bâb fevkānî oda ve iki bâb tahtânî oda ve bir sofa ve bir matbah ve bir sagīr oda ve bir kiler ve bir su kuyusu ve iki kenîfi ve eşcâr-ı müsmire ve gayr-ı müsmire bahçeyi müştemil dâhiliyye ta‘bîr olunur mülk menzilimi cümle tevâbi‘ ve levâhıkı ve kâffe-i menâfi‘ ve merâfıkıyla mûmâ-ileyh Mustafa Efendi’ye tarafeynden îcâb ve kabûlü hâvî bey‘-i bâtt-ı sahîh-i şer‘îyle iki bin esedî guruş ile meclis-i akidde bir kabza fülûs-ı mudî‘aya bey‘ ve teslîm ol dahi ber vech-i muharrer iştirâ ve tesellüm ve kabûl eylediğinden sonra benim olan meblağ-ı mezbûr iki bin esedî guruşu mûmâ-ileyh Mustafa Efendi yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda benim bir vechile alâka ve medhalim kalmayıp mûmâ-ileyh Mustafa Efendi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde vukū‘u üzre tahrîr ba‘dehû ma‘an irsâl olunan Receb Çelebi b. Şaban ve Mahmud b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hasan Efendi b. Mustafa el-İmâm, Mahmud beşe b. Mehmed, Ahmed Efendi el-İmâm, Mehmed Bey b. Osman el-Yesârî, Ali Bey b. Sâim el-Yesârî, Yusuf Beşe b. Abdullah, Ebûbekir Efendi Hoca, Ahmed Bey b. Mustafa, Mehmed Çelebi b. Abdullah, Mehmed Çelebi b. Receb Ağa, Ahmed Ağa b. İbrahim, Receb Çelebi b. Şaban.