İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 387 Hüküm no: 373 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori’nin bakkal dükkânı gediğindeki hissesini Bakkal Yorgi’ye sattığı Bakkāl Vilâyet-i Rumeli’de Yenişehir-i Fener kazâsına muzâfe Ağrafe nâhiyesine tâbi‘ Vineni karyesinde mütemekkin Todori v. Estemoli nâm zimmî tarafından husûs-ı âti’l-beyânda vekîli olduğu Bakkāl Nikola v. Kostandi ve Bakkāl Kosti v. Yorgi nâm zimmîler şehâdetleriyle sâbit olan Bakkāl Kostandi v. Nikolaki nâm zimmî meclis-i şer‘-i hatîrde işbu bâ‘isü’s-sifr Bakkāl Yorgi v. Yani nâm zimmî muvâcehesinde bi’l-vekâle ikrâr-ı tâm ve takrîr-i kelâm edip İstanbul’da Alacahamam kurbünde kâin Hacı Mahmud dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Ahmed Ağa’nın ve yirmi beş sehmi Zaharya zimmînin ve on iki buçuk sehmi Kostandi zimmînin ve kırk sehmi Angeli zimmînin ve mâ‘adâ on iki buçuk sehmi dahi müvekkilim mersûm Todori zimmînin akd-i âti’z-zikrin sudûruna değin yedlerinde mülkleri olmağla ben gedik-i mezkûrdan müvekkilim mersûmun ber-minvâl-i muharrer mâlik olduğu on iki buçuk sehm hisse-i şâyi‘asını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve izn-i şürekâ ile mersûm Yorgi zimmîye altı yüz elli guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr altı yüz elli guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrun hisse-i şâyi‘a-i mezkûresinde müvekkilim mersûmun aslâ ve kat‘â alâka ve medhali kalmayıp müşteri-i mersûm Yorgi zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 şehri Ramazan sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Kostandi v. Dimo, Ligor v. Kostandi.