İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 388 Hüküm no: 374 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkova ile kızları Magdali ve Kalo’nun bakkal dükkânı gediğindeki hisselerini Bakkal Angeli’ye sattıkları Bakkāl Vilâyet-i Rumeli’de Yenişehir-i Fener kazâsına muzâfe Ağrafe nâhiyesine tâbi‘ Vineni karyesinde mütemekkineler Praşkova bt. Ananosti ve sadriye kebîre kızları Magdali ve Kalo bintey Yorgi nâm Nasrâniyeler taraflarından husûs-ı âti’l-beyânda vekîl olduğu şahıslarını ârifân Bakkāl Nikola v. Kostandi ve Bakkāl Kosti v. Yorgi nâm zimmîler şehâdetleriyle sâbit olan Bakkāl Kostandi v. Nikolaki nâm zimmî meclis-i şer‘-i hatîrde müvekkilât-ı mersûmâtdan mersûme Praşkova Nasrâniyenin sadrî kebîr oğlu işbu bâ‘isü’s-sifr Bakkāl Angeli zimmî muvâcehesinde bi’l-vekâle ikrâr-ı tâm ve takrîr-i kelâm edip İstanbul’da Alacahamam kurbünde kâin Hacı Mahmud dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Ahmed Ağa’nın ve on yedi sehmi mersûm Angeli zimmînin ve yirmi beş sehmi Zaharya zimmînin ve on iki buçuk sehmi Kostandi zimmînin ve on iki buçuk sehmi Todori zimmînin ve altı sehmi müvekkilât-ı mersûmâtdan mersûme Praşkova Nasrâniyenin ve sekiz buçuk sehmden on yedi sehmi müvekkilâtân-ı mersûmetân Magdali ve Kalo Nasrâniyelerin akd-i âti’z-zikrin sudûruna değin yedlerinde mülkleri olmağla ben gedik-i mezkûrdan müvekkillerim mersûmâtın ber-minvâl-i muharrer mâlikeler oldukları cem‘an yirmi üç sehm hisse-i şâyi‘alarını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ-i sâire mersûm Angeli zimmîye bin yüz guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr bin yüz guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrun on yedi sehmi mukaddemâ ve yirmi üç sehmi hâlâ ki cem‘an kırk sehm hisse-i şâyi‘alarında müvekkillerim mersûmâtın aslâ ve kat‘â alâka ve medhalleri kalmayıp müşteri-i mesfûr Angeli zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 N sene [1]247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Kostandi v. Dimo, Ligor v. Kostandi.